Rusiye uquq qoruyıcıları Rusiye kontrolindeki Qırım Yuqarı mahkemesiniñ binası ögünde tutulğan 13 qırımtatar faalinden beşi Aqmescitteki Jeleznodorojnıy rayon mahkemesine ketirildi, dep haber ete Qırım.Aqiqat mühbiri.
Parmaq izlerini bermege razı olmağanları içün er birine qarşı Rusiye Federatsiyası Memuriy uquq bozuvları kodeksiniñ 20.2.2 maddesine istinaden (Cemaat yerlerinde vatandaşlarnıñ aynı vaqıtta kütleviy bulunuvı ve (ya da) areketini teşkil etüv, cemaat yerlerinde vatandaşlarnıñ aynı vaqıtta kütleviy bulunuvı ve (ya da) areketine çağıruv) protokol tizildi.
Mühbirniñ aytqanına köre, mahkemede diñleycilerni «iş künü bitkeninden» içeri almaylar.
«Qırım birdemligi» cemaat birleşmesi haber etkenine köre, tutulğanlarnıñ menfaatlarını uquqçılar Nazim Şeyhmambetov ve Rustem Kâmilev temsil etecekler.
Berilgen malümatqa köre, iyülniñ 27-nde mahkeme binası ögünde şikâyet arizası baqılğan Nariman Celâl ve ağa-qardaş Asan ve Aziz Ahtemovlarnıñ tarafdarları toplaştı. Davalarında şikâyet arizası baqılacaq. Aq qorçalayıcılarnıñ malümatına köre, saat 10:30-da 13 insan tutuldı – 10 erkek ve üç qadın.
Berilgen malümatqa köre, Rusiye kontrolindeki Qırım Yuqarı mahkemesiniñ binası ögünde tutulğanlar arasında qırımlı aq qorçalayıcı Lutfiye Zudiyeva, siyasiy mabüs Aziz Ahtemovnıñ anası Zarema Ahtemova, «Qırım birdemliginiñ» mühbiri Kulamet İbraimov ve siyasiy mabüs Nariman Celâlnıñ qardaşı Ruslan Celâlov bar.
2022 senesi sentâbrniñ 21-nde Rusiye kontrolindeki Qırımnıñ Yuqarı mahkemesi Nariman Celâlnı 17 yıl sert rejimli koloniyada qalmasına üküm etti. Bundan ğayrı, 700 biñ ruble para cezası berildi ve azatlığı 1,5 yılğa sıñırlandı.
Asan Ahtemov 15 yıl sert rejimli koloniyada qalmasına üküm etildi. Oña 500 biñ ruble para cezası berildi ve 1 yıl qadar azatlığı sıñırlandı. Aziz Ahtemov 13 yıl sert rejimli koloniyada qalmasına üküm etildi. Oña da 500 biñ ruble para cezası berildi ve azatlığı 1 yılğa sıñırlandı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
