Kyiv istinaf mahkemesiniñ qadılar kollegiyası cumaertesi künü, dekabrniñ 28-nde, 2014 senesi Euromaydanda insanlarnı atıp öldürgeninde qabaatlanğan «Berkut» mahsus bölügi sabıq hadimlerininiñ sıñırlav tedbirini deñiştirdi ve olarğa şahsiy mecburiyet belgiledi, dep haber ete Azatlıq Radiosı.
Apiste olğan Oleg Yanişevskiy, Sergey Zinçenko ve Pavel Abroskin ve ev apsinde bulunğan Sergey Tamtura ve Aleksandr Marinçenkoğa şahsiy mecburiyet belgilendi.
Zarar körgen taraf mahkemeden qabaatlanğan sabıq «Berkut» hadimleriniñ istinaf şikâyetlerini qabul etmemesini rica etti.
Kyiv istinaf mahkemesiniñ dekabrniñ 28-nde olğan oturışuvında prokurorlar sabıq «Berkut» hadimleri Ukraina ve «LDNR» aydutları arasında tutulğan şahıslarnı deñişim cedveline kirsetildi, dep tasdıqladı.
Ukraina prezidenti Volodımır Zelenskıy tutulğan şahıslarnı deñişim bazar künü, dekabrniñ 29-na, planlaştırıla, dep tasdıqladı.
Maydanda insanlarnı atıp öldürüv davasınıñ mabüsleri vazifeden tış areketlerde, silânı qanunsız qullanğanında, Maydan faallerini öldürgeninde ve zarar körgeninde qabaatlandı. Sabıq «Berkut» hadimleri qabaatlarını tanımadı.
2018 senesi fevral ayına qadar tahqiqat 2014 senesi fevralniñ 20-nde Kyivniñ merkezinde 48 öldürüv ve 80 öldürüv teşebbüsi olğanını bildi.
