Bellingcat halqara tahqiqat gruppası Ukrainada viran etilgen vatandaş obyektleriniñ interaktiv haritasını derc etti.
Bellingcat qayd etkenine köre, tek «foto ve videosı yapılğan adiseler» kirsetildi. Olarnıñ arasında – «meskün kvartallarğa tüşken raketalar, viran etilgen vatandaş infrastrukturası, yaralanğan şahıslar ya da areket etmegen sakinlerniñ bedenleri». Haritada bir qaç yüz böyle «adise» qayd etildi. Anda vatandaş ealisine zarar ketirgen silâ çeşitleri de qayd etile.
Tahqiqat gruppası, «Rusiye akimiyeti barışıq sakinlerge ücüm etmey ve vatandaş infrastrukturasına darbe endirmemege tırışa, dep aytqanda viranelerni qayd etmek pek müim», dep qayd ete.
Ukrainağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Mesken rayonlarğa top, çoqlu ateş sistemaları ve ballistik raketalar vastasınen ateş açıla. Rusiye ordusınıñ zırhlı tehnikası Kyiv ve Rusiye sıñırına yaqın bir qaç vilâyet merkezini sarıp almağa tırışa.
Rusiye Ukrainağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: rukrymr.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
