Kıyivde yanvarniñ 21-nde Gulliver ticaret merkezinde qırımtatar ve ukrayin cemiyetleriniñ vekilleri belli qırımlılarnıñ portretlerinden ibaret fotoresim sergisini açtılar, dep haber ete Qırım.Aqiqat mühbiri.
Serginiñ hususiyeti şu edi ki, fotoresimlerniñ er bir qaramanınıñ yaqasunda sarı şerit bar edi, bu ise olarnıñ Qırım ilhaqına qarşı Qırımdaki "Sarı şerit" narazılıq areketine birdemlik köstergenini, diger taraftan ise Qırımnıñ azatlığı içün küreşmek ve Qırım yarımadasında azat etilgen evlerine tez vaqıtta qaytmaq istegenlerini ifadeley edi.
Sergi belli Qırım sportçusı, bediiy gimnastika boyunca dünya çempionı ve olimpik medal saibi Anna Rizatdinovanıñ teşebbüsi ile teşkil etildi. Sergini açıp, Anna böyle sergini keçirmek ğayesi oña "Qırımnı Rusiye Federatsiyasınıñ işğaline qarşı narazılıq olaraq qorçalağan qırımlılarnıñ yüreklerinde, 11 yıl ayırılğan soñ bile, tuvğan yarımadağa, onıñ keñliklerine ve dağlarına, şeer ve köylerine, ağaç ve çiçeklerine, Qara deñizge, Salğır ve diger özenlerge, hatırada yaqın ve qıymetli qalğan er şeyge sevgi saqlanıp qalğanını" añlağan soñ keldi, dep bildirdi o. Anna Rizatdinovanıñ aytqanına köre, serginiñ esas maqsadı — belli qırımlılarnıñ şahsiy ikâyelerini aydınlatmaq, insanlarnıñ öz Vatanınen bağını, onıñ azatlığı içün küreşmek istegini köstermektir.
Sergide qırımtatar halqınıñ lideri, sovet dissidentı, Qırımtatar Milliy Meclisiniñ 2014 senesine qadar yolbaşçısı Mustafa Cemilev, Rusiye-Ukrayina cenki iştirakçisi, Azov polkunıñ veteranı Asan İsenacıyev, şimdi Ukrayina Arbiy quvetleri erkânında cenkleşken belli kinorejissör, "Kiborgi" filminiñ müellifi Ahtem Seytablayev, qırımtatar asıllı ukrayin yırcısı, "Eurovision-2016" ğalibi, 2024 senesi Şevçenkov mukâfatınıñ laureatı Jamala, 2022-2024 seneleri Ukrayina Prezidentiniñ Qırım Muhtar Cumhuriyetindeki temsilcisi, Ukrayina halq deputatı Tamila Taşeva, belli haber portalınıñ muarriri Sevgil Musayeva.
Sergi içün fotolarnı belli ukrayin fotoressamı Konstantin Liberov yaptı. O ömür arqadaşı Vlada Liberovanen beraber, Rusiyeniñ Ukrayinağa qarşı yapqan cinayetlerini qayd ete, foto sanatı vastası ile ukrayin arbiyleriniñ qaramanlığı ve cenk vaqtında yaşayış kerçekleri aqqında ikâye ete.
Sergi fevralniñ ortasına qadar çalışacaq. Sergi teşkilâtçılarınıñ aytqanına köre, o, pek populâr olacaq, çünki er kün Ukrayina paytahtınıñ on biñlernen sakini ve musafiri keçecek. Bundan da ğayrı, sergi Gulliver ticaret merkeziniñ ögünde büyük ekranlarda kösterilecek.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
