Mayısnıñ 11-ne keçer gecesi Rusiyeniñ Belgorod şeeri civarındaki bir qaç köy Ukrayına ordusınıñ ateşine oğradı – sekiz kişi yaralandı, onlarnen zarar körgen ev bar, dep bildirdi region valisi Vâçeslav Gladkov.
Gladkovnıñ malümatına köre, cam yaraları olğan beş kişi hastahanege alındı, daa üç kişige adise yerinde yardım kösterildi. Belgorod rayonınıñ beş köyünde eñ az 45 evniñ camları qırıldı, fasad, dam, qoraları zarar kördi. Bir qaç maşina zarar kördi, dep bildire memur.
Sıñırdaki yerler de ateşke oğradı – üç bina ve eki maşina zarar kördi, beş köyniñ sakinleri ışıqsız qaldı.
Gece Kursk vilâyetinde de eki uçucısız tüşürildi, dep bildirdi region valisi Roman Starovoyt. Onıñ aytqanına köre, bir danesi hocalıq inşaatı yanında tüşip, mesken evlerniñ camlarına zarar ketirdi.
Rostov vilâyetindeki Küberle stantsiyasında yük treniniñ bir qaç vagonı relslerden çıqtı, dep haber ete Şimaliy-Kavkaz demiryolu. Yaralanğanlar yoq. Trenlerniñ areketi başlandı. Yolcu trenleri keç qalacaq. Qayd etilgenine köre, qaza neticesinde yük yanıp başladı. Anda yaqarlıq bar edi, dep bildire Rostov Fevqulâde vaziyetler nazirligi.
Rusiye Mudafaa nazirliginiñ malümatına köre, gece Belgorod vilâketinde doquz uçucısız ve 21 raketa yoq etildi, daa yedi dron Kursk ve Volgograd vilâyetlerinde yoq etildi.
Rusiyeniñ Ukrayınağa qarşı büyük istilâsı başlağanından Rusiye regionları ateş ve uçucısızlarnıñ ücümlerine oğray. Rusiye Mudafaa nazirligi Ukrayına ücümlerini «keri qaytarğanını» bildire ve Rusiyede tüşürilgen raketa ve dronlar aqqında haber ete. Kyiv bu malümatnıñ çoqusını izaatlamay.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
