Ukrayına Mudafaa nazirliginiñ Baş istihbarat idaresi Rusiyeniñ Belgorod vilâyetindeki vaziyetni izaatladı.
«E, bugün Rusiye Federatsiyasınıñ vatandaşlarından ibaret «Rus göñülli korpusı» ve «Rusiyeniñ Azatlığı Legionı» Belgorod vilâyetiniñ topraqlarını Putinniñ rejiminden azat etüv ve Ukrayına vatandaş ealisini qorumaq içün belli bir telükesizlik şeritini yapmaq maqsadınen duşmannı çetleştirüv operatsiyasını başlattı», – dep ayttı Ukrayına Mudafaa nazirliginiñ Baş istihbarat idaresiniñ vekili Andriy Yusov «Suspilne» izaatlarında.
Saat 14:00-lerde bu birleşmeler Belgorod vilâyetiniñ Közinka köyüni «azat etüv» aqqında bildirip, Grayvoron mesken noqtasına kirdi. Belgorod vilâyetiniñ valisi Vâçeslav Gladkov bildirgenine köre, Grayvoron bölgesine «Ukrayına Silâlı quvetleriniñ diversion-istihbarat gruppası kirdi».
Mayısnıñ 22-nde Rusiye ve Ukrayına içtimaiy ağları ve mediasında Rusiyeniñ Belgorod vilâyeti ve Harkiv vilâyeti arasındaki Ukrayına-Rusiye sıñırında uruş çatışmaları aqqında haberler peyda oldı.
«Rus göñülli korpusı» – Rusiyeden ketken, Ukrayına tarafında cenkleşken sağ faaller qurğan silâlı bir birleşme. Birleşme arbiyleri Rusiyege kene reyd kerçekleştirdi, dep bildirdi. Korpus derc etken videoğa köre, RGK işaretinen silâlı insanlar Bezlüdovka, Çuroviçi ve Lübimovka köyleriniñ levhaları ögünde tura. Bezlüdovka Belgorod vilâyetindeki Şebekinoğa yaqın, Çuroviçi Brânsk vilâyetinde buluna, Lübimovka degen köy sıñır regionlarında çoq bar (hususan Brânsk ve Kursk vilâyetlerinde).
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
