Belgorod yanvarniñ 3-nde saba raketa ücümine oğradı. Şeerde telüke ilân etildi, ava mudafaası çalıştı, dep bildirdi Belgorod vilâyetiniñ gubernatorı Vâçeslav Gladkov.
Memurnıñ aytqanına köre, şeerge yaqınlaşqanda bir qaç nişannı yoq etkenler. Yıqıluvlar ve zarar körgenler aqqında malümat yoq. Gladkov şunı da bildirdi ki, Valuysk şeer okrugınıñ Soloti köyü ateşke oğradı. Eki evniñ pencereleri sındı ve damı zarar kördi. Beyanatqa köre, köyde zarar körgenler yoq.
''Belgorodda vaziyet kerginleşmege devam ete. Saba eki kere ateş açıldı. Ava mudafaası işke tüşürildi. Kündüz yarıqlanğanda, evni baqıp çıqacaqmız, zarar körgen yerlerni, damlarnı, pencerelerni, fasadlarnı baqacaqmız ve tamir işlerine başlaycaqmız", - denile Gladkovnıñ haberinde.
Bundan ğayrı, yanvarniñ 3-ne keçken gecesi Qırım.Aqiqat mühbiri, Aqyarda patlavlar yüz bergenini bildirdi. Şeerniñ rusiyeli başı Mihail Razvojayev, raketa tüşürildi ve zarar ketirmedi, dep bildirdi. Amma ''Krımskiy veter'' telegram kanalı, eki patlavdan soñ şeerde duman köründi, dep bildirdi.
Ukrayina tarafı Rusiye akimiyetiniñ beyanatını izaatlamadı.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Daa bir patlav 2023 senesi iyülniñ 17-nde oldı. Avgustnıñ 12-nde Rusiye akimiyeti Keriç köprüne yapılğan daa eki ücüm aqqında bildirdi. Yarımadada yüksek (sarı) terror telükesi seviyesi devam ete. Aqmescit ava limanı qapalı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
