Mayısnıñ 22-nde saba Telegram kanalları ve kütleviy haber vastaları Belgorod ve Harkiv vilâyeti arasındaki Rusiye-Ukrayına sıñırında deşetli uruş çatışmaları aqqında bildirdi.
İçtimaiy ağlarda Belgorod vilâyetiniñ Grayvoron rayonındaki sıñırnıñ kontrol-keçiş noqtasına endirilgen darbelerniñ videosı peyda oldı. Videolardan birinde keçiş noqtasına Ukrayına bayrağı altında tank kire. Tahminlerge köre, keçiş noqtasınıñ binasında çıqarılğan videoda öldürilgen arbiyniñ cesedi körüne. Videonıñ doğru olıp olmağanı tasdıqlanmağan.
Belgorod vilâyetiniñ valisi Vâçeslav Gladkov Ukrayınanı «telâşqa çağırğan Belgorod vilâyetine qarşı informatsion ücüm» yapqanında qabaatladı. O, Grayvoron rayonına ateş açılğanını tasdıqladı, amma yaralanğan ya da öldürilgenler olmadı, dep ayttı. Akimiyet eali tahliyesi aqqında haber etmedi, dep ayta.
Ukrayına arbiyleri bu haberlerni izaatlamay.
«Rus göñülli korpusı» silâlı birleşmesi bildirgenine köre, onıñ azaları Rusiyege kene barıp keldi. Korpus derc etken videoğa köre, RGK işaretinen silâlı insanlar Bezlüdovka, Çuroviçi ve Lübimovka köyleriniñ levhaları ögünde tura. Bezlüdovka Belgorod vilâyetindeki Şebekinoğa yaqın, Çuroviçi Brânsk vilâyetinde buluna, Lübimovka degen köy sıñır regionlarında çoq bar (hususan Brânsk ve Kursk vilâyetlerinde).
Martnıñ başında RGK Brânsk vilâyetine kerçekleştirilgen reyd içün mesüliyetni öz boynuna aldı. O reyd vaqtında askerler eki köyni aldı. Rusiye akimiyeti barışıqsever sakinler arasında qurbanlar oldı, dep bildirgen edi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
