Rusiyeniñ Belgorod vilâyeti valisi Vâçeslav Gladkov mayısnıñ 22-nden başlap regionda «qarşı terror operatsiyasınıñ rejimi» kirsetildi.
«Bugünden başlap Belgorod vilâyetinde vatandaşlarnıñ telükesizligini temin etmek maqsadınen mahsus tedbir ve vaqtınca sıñırlav belgilegen qarşı terror operatsiyasınıñ rejimi kirsetile. İnsanlarnıñ şahsiyet vesiqalarını teşkerüvden başlap, patlayıcı, radioaktiv, himk ve biologik ceetten telükeli maddelerni qullanğan telükeli müessise ve teşkilâtlarnıñ faaliyetini toqtatuvğa qadar», – dep yazdı Gladkov Telegramda.
Gladkovnıñ bildirgenine köre, Ukrayına ile sıñırda bulunğan Belgorod vilâyetiniñ Grayvoron bölgesine «Ukrayına Silâlı quvetleriniñ diversion-istihbarat gruppası» kirdi. Bundan evel Rusiyeniñ Belgorod vilâyeti ve Harkiv vilâyeti arasındaki Ukrayına-Rusiye sıñırında çatışmalar aqqında haber etilgen edi.
Ukrayına Mudafaa nazirliginiñ Baş istihbarat idaresiniñ vekili Andriy Yusov bildirgenine köre, Rusiye Federatsiyasınıñ vatandaşlarından ibaret «Rus göñülli korpusı» ve «Rusiyeniñ Azatlığı Legionı» Belgorod vilâyetiniñ topraqlarını Putinniñ rejiminden azat etüv operatsiyasını başlattı.
Uquq qoruyıcılar Rusiye prezidenti Vladimir Putinge vaziyet aqqında bildirdi. Putinniñ spikeri Dmitriy Peskov Rusiye prezidentiniñ «Ukrayına diversantlarınıñ Belgorod vilâyetine kirmege tırışqanından» haberi bar, dep ayttı.
Ukrayına prezidentiniñ ofisi Ukrayına Belgorod vilâyetindeki adise-vaqialarnı közete, amma olarnen «doğrudan alâqası yoq», dep bildirdi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
