Belçika bu yıl Ukrayınağa 611 million euroliq arbiy yardım köstermege planlaştıra, dep bildirdi yanvarniñ 22-nde Ukrayına mudafaa naziri Rustem Umerov Belçika mudafaa naziri Lüdivin Dedondernen telefonda laf etip.
«Belçika ortaqlarımıznıñ yardımına büyük emiyet beremiz. Bu yıl Belçika 611 million euro arbiy yardım köstermege ve mudafaa quvetlerimizniñ modernizatsiyasına uzun müddetli qoltutuvnı vade etmege planlaştıra», – dep yazdı Umerov Facebook saifesinde.
Ukrayına mudafaa naziri Belçika zenaatdaşınen beraber olar cebedeki soñki adise-vaqialarnı ve memleketler arasında mudafaa işbirligi imkânlarını muzakere ettiler, dep qoştı. O, Belçikağa Ukrayına uçucılarını ögretüv programmasında iştirak etkenleri içün teşekkürler bildirdi.
Dedonder subetni izaatlamadı, amma X içtimaiy ağında (eski Twitter) Ukrayına Mudafaa nazirliginiñ bu muzakerenen bağlı resmiy haberini paylaştı.
Belçika Ukrayınağa maddiy yardım köstergen edi – bıltır memleket eñ büyük yardımlardan birini kösterip, Ukrayınağa arbiy qoltutuvnı quvetleştirdi. Bundan ğayrı, Belçika F-16-da Ukrayına uçucılarını ögretüvde faal iştirak ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
