Mayısnıñ 15-ne keçken gecesi Belbek ava limanına etilgen ücüm neticesinde eki MiG-31 uçağı ve yaqıt-yağ malzemeleri anbarı zarar kördi, dep bildire ASTRA menbalarğa esaslanıp.
Telegram-kanalnıñ malümatına köre, 11 Rusiye arbiyi yaralandı. Bundan ğayrı, mayısnıñ 15-nde saba raketa Vişnevoye köyü rayonında S-400 "Triumf" ZRK-sına urdı. Eki arbiy elâk oldı, daa ekisi yaralandı, dep aytıla haberde.
Muarririyet Rusiye Federatsiyasınıñ ğayıpları aqqında malümatnı tasdıqlap olamay. Rusiye tarafı ASTRA malümatını izaatlamadı.
Lâkin Qırım.Aqiqat tarafından ögrenilgen uydu resimleri mayısnıñ 15-nde Belbek uçaq alanında yanğın çıqqanını tasdıqlay.
Mayısnıñ 15-nde aqşam yerli ve Rusiye telegram kanalları Belbek Rusiye arbiy uçaq alanu civarında patlavlar aqqında haber etti, Aqyarda ise ava telükesi ilân etildi. Bundan ğayrı, bir sıra Qırım telegram kanalları yerli sakinlerge esaslanıp, Aqmescit, Kezlev, Canköy ve Rusiye arbiy ava limanları yerleşken Sarabuz şeerlerinde patlav sesleri eşitile, dep bildire.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Daa bir patlav 2023 senesi iyülniñ 17-nde oldı. Avgustnıñ 12-nde Rusiye akimiyeti Keriç köprüne yapılğan daa eki ücüm aqqında bildirdi. Yarımadada yüksek (sarı) terror telükesi seviyesi devam ete. Aqmescit ava limanı qapalı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
