Resmiy malümatqa köre, Belarusta aprelniñ 26-sında 10463 tasdıqlanğan COVID-19 hastası oldı. Akimiyet 72 ölümni tasdıqladı ve 1700-den ziyade adam yahşı olğanını qayd etti, bildire Azatlıq Radiosı.
"Belta" agentligi bildirgeni kibi, memlekette 150 biñge yaqın COVID-19 testi yapıldı.
Belarus prezidenti Oleksandr Lukaşenko, "iqtisadiyatnı toqtatmamağa" qarar alğanını bildirdi, çünki başqa türlü aqibetler "zengin ve küçlü memleketlerge tabi olmasınıñ ya da asıl boysunmasınıñ sebebi ola bile".
Belarus içtimaiy mesafeler içün tedbirler körmegeni ve koronavirus yayılması şaraitinde içtimaiy tedbirlerni sıñırlamağanı içün defalarca tenqit etildi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
