Qırımda patlayıcı madde ve silânı qanunsız saqlağanında qabaatlanğan qırımtatar faali Edem Bekirovnıñ imayesi, tahqiqatqa faalciniñ alibisini teşkermekten red etken, Rusiye FSB tahqiqatçısı İvan Romanetsniñ areketlerine şikâyet yolladı.
Bu aqta”Agora” halqara uquq qoruyıcı gruppasınıñ advokatı Aleksey Ladin “Qırım.Aqiqat” mühbirine bildirdi.
Advokatnıñ aytqanına köre, Bekirov sorğuda Qırımda ne vaqıt ve yerde bulunğanını, tanışlarından onı kim körgenini adım-adım, daqqa-daqqa aytıp berdi.
Böyleliknen, imaye, gizlengen saat Mametov aytqan yerde Bekirovnıñ bulunmağanına ve patlayıcınen patronlarnı oña bermegenine alibi kösterdi.
Bundan soñ Ladin, Bekirovnıñ ukrain ve rus sim-kartalarınen cep telefonlarnı alıp, onıñ 2018 senesi mayıs ayında bulunğan yerlerini teşkermege tahqiqatqa muracaat yolladı.
“Tahqiqatçı sebepsiz ve delilsiz alibi teşkermesini red etti, bu onıñ borcu olğanına baqmadan bile. O, tahqiqat öyle de er şeyni bile ve qoşma malümatta ihtiyacı yoq dep bu qararnı añlattı. Böylece, o öz areketleriniñ sade şekilcilik olğanını kösterdi ve tahqiqatnıñ Cinayet-Usul Kodeksine iç bir alâqası olmağanını tasdıqladı. Körünip tura ki, böyle munasebetnen tahqiqat ve mahkemeniñ de keregi yoq. Aysa, FSB sadece Bekirovğa ükmüni çıqarsın, bunen de er şey biter”, - Romanetsniñ qararını tefsir etti advokat.
Herson vilâyetindeki Novooleksiyıvka qasabasınıñ sakini Edem Bekirov dekabrniñ 12-nde saba Qırım kirişinde Rusiye uquq qoruyıcıları tarafından tutıldı. O, 78 anasını ve aqrabalarını ziyaret etmek içün Qırımğa ketti. Daa soñra onı Aqmescitteki Rusiye FSB binasına alıp ketkenler. Kreml kontrolindeki Aqmescitniñ Kiyev rayon mahkemesi dekabrniñ 13-nde Bekirovnı eki ayğa apiske aldı. O, 2019 senesi fevralniñ 11-ne qadar nezaret altında qalacaq.
Ukraina Tış işler nazirligi mahkemeniñ qararına qarşı «sert narazılıq» bildirdi.
Bekirovnıñ tuvğanları ayatı telükede olğanını bildirgen edi. Malüm ki, apiske alınğan faal şeker hastası ola. Ayağı kesilgen, muntazam sürette sarğılav yapılmalı.
Yanvarniñ 15-nde Bekirov Aqmescitteki Semaşko hastahanesine tibbiy teşkerüv yapılması içün alıp ketirildi. Yanvar 18-inde Edem Bekirovnı, hastahaneden Aqmescit SİZOsınıñ mahsus blokına çıqarğanlarını Lüdmila Denisova bildirdi.
