Mahkeme onı 2022 senesi Qırımda seferberlik aqqında qırımtatar faallerinden biriniñ intervyüsını derc etkeni içün «Rusiye ordusını itibardan tüşürgen açıq areketlerde» qabaatladı. Para cezasınıñ miqdarı 100 biñ ruble.
Qayd etilgenine köre, diñleyiciler oturışuvğa kirip olamadı, çünki mahkeme ziyaretlerinde «terror ile küreş tedbirlerinen» bağlı sıñırlavlar kirsetildi. Dava tahminen 20 daqqa baqıldı, aq qorçalayıcılarnıñ fikirince, bu da davanıñ tarafsız ve er taraflama baqıluvından şübheler doğurdı.
Mayısnıñ 17-nde Qırımda Rusiye uquq qoruyıcıları «Qırım» gazetasınıñ baş muarriri Bekir Mamutov ve «Qırım» gazetasınıñ tesisçisi Seyran İbragimovnıñ evlerinde tintüv keçirdi.
Bekir Mamutovğa qarşı Rusiye ordusını itibardan tüşürüv ve «Qırım» gazetasınıñ saytında sahte malümatnı derc etüv manaçığınen eki protokol tizildi. Onıñ davaları Aqmescitniñ Kiyev mahkeme rayonınıñ Mirovoy mahkemesinde ve Kiyev rayon mahkemesinde baqılacaq.
«Qırım» gazetasınıñ tesisçisi Seyran İbragimovğa qarşı aynı maddelerge istinaden eki protokol tizildi.
«Qırım» gazetası 1989 senesi iyül ayından berli qırımtatar tilinde çıqa ve qırımtatarlar Qırımğa qaytqan soñ ana tilinde çıqqan ilk neşirlerden biri ola.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
