Beşterek-Zuya suv yolu borusını martnıñ 18-nde faaliyetke kitirecekler. Andan suv Aqmesctke aqacaq. Bunı «Rossiya-24» telekanalınıñ yaynında Qırımnıñ Rusiye quruv ve mimarlıq naziri Mihail Hramov bildirdi.
«Martnıñ 18-nde suvnı Aqmescitke yibrecek olamız. Suv yolu borusınıñ uzunlığı 19 km, Aqmecitke ketecek suvnıñ miqdarı künde eñ azından 22 biñ metr kub», – dey Hramov.
Rusiyeniñ baş nazir muavini Marat Hunsulin fevralnıñ 18-nde, yarımada sakinlerini toqtamadan suvnen temin etmek içün Belbek özeninde suv aluv yapısınıñ ve Beşterek suv yolu borusınıñ quruluvı yaqın aylarda yekünlenilecek, dep bildirgen edi.
Ukraina, Qırımnıñ içecek suv ihtiyaclarınıñ 85%-ni yarımadanen bağlağan Dnipro aqıntı yolu olğan Şimaliy-Qırım kanalı vastasınen teminlegen edi. 2014 senesi Rusiye Qırımnı işğal etken soñ yarımadağa suv berilmesi toqtatıldı.
Qırımdaki suv yedekleri suv anbarları ve yerastı çoqraqlardan toldurıla. Ekologlarnıñ aytqanına köre, yerastı çoqraqlarnıñ muntazam sürette qullanılması yarımadada topraqnı tuzlattı. Qırım akimiyeti yarımada sakinlerini suvnı az qullanmağa çağıra.
2020 senesi Qırımdaki suv teminlevi vaziyeti kritik oldı. Qırımlı alimlerniñ bildirgenine köre, yağanaqlar yağmağanı içün ve qar az yağğan qış neticesinde qurğaqlıq oldı.
Avgustnıñ soñunda Aqmescitte, Aqmescit ve Bağçasaray rayonlarında suv berüv cedvelleri kirsetilgen edi. Daa soñra Qarasuvbazarda, Qarasuvbazar rayonında ve qısmen Aluştada cedveller kirsetildi.
Kreml kontrolindeki Qırım yolbaşçısı Sergey Aksenov Rusiye Qırımnıñ suv teminlevini fevqulâde vaziyet olaraq tanıması mümkün, dep ayta. O, 2020 senesi 150 yıl içinde eñ quru oldı, dep bildirdi.
Rusiye akimiyeti yañı suv boruları, suv qoralarınıñ quruluvına ve quyu qazıluvına milliardlarnen ruble ayırdı.
BM Ukraina Monitoring missiyası, halqara uquqqa köre, Rusiye Qırım ealisini suvnen temin etüvden mesüliyetli ola, dep israr ete.
Resmiy Kyiv, Şimaliy-Qırım kanalından suv yarımadağa tek Qırım işğalden qurtarılğan soñ berilecek, dep bildire.
