Bağçasaraydaki üçünci «Hizb ut-Tahrir davasınıñ» mabüsi Rustem Seytmemetov Qırımdan çıqarılıp, Rusiyeniñ Rostov-na-Donu №1 SİZOsınıñ mahsus blokuna avuştırıldı. Seytmemetov alı bir qarar olğanını ayta, dep bildirdi advokatı Nazim Şeyhmambetov «Qırım birdemligine».
«Bu tedbirler zaten belli. Daa evel Qırımdan etap etilgen diger müvekkilerimiz de aynı yoldan keçken edi. Olarnı bir müddetke karantin kameralarına yollaylar, soñra bir kişilik kameralarğa, anda üç-dört afta tutula, bazı vaqıtları bir ay, bazıda aydan çoq, soñra olarnı umumiy kameralarğa yollaylar», – dedi advokat.
Şeyhmambetovnıñ aytqanına köre, dekabrniñ 2-nde müvekkilinen yapılğan körüşüv pek qısqa oldı, çünki tahqiqat izolâtorınıñ hadimleri Seytmemetovnı advokat ile körüşüvine keç çıqardı.
«Qayd etmek isteyim ki, o ve diger müvekkilerimiznen daa devamlı körüşüv yapmağa istedim, amma böyle fursatım olmadı. Rustem ağanen tahminen 30 daqqa laf ettik. Maña belli olmağan sebeplerden tahqiqat izolâtorınıñ hadimleri onı üyle yemeginden yarım saat ögüne çıqarğanlar. Men saba ert Rostovda olsam da, tahminen bir buçuq saat onı beklep oturdım», – dep qayd etti Şeyhmambetov.
Hatırlatamız, 2020 senesi mart ayında Bağçasarayda «Hizb ut-Tahrir» ile alâqaları olğanında qabaatlanğan Osman Seytumerov, Seytumer Seytumerov ve Rustem Seytmemetov noyabr ayında Aqmescit SİZOsından qomşu Rusiyeniñ Rostov-na-Donu şeerine etap etildi.
2020 senesi martnıñ 11-nde Bağçasarayda bir qaç qırımtatarınıñ evi tintildi: Enver Mustafayev, Amet Suleymanov, ağa-qardaş Seytumer ve Osman Seytumerovlar ve emceleri Rustem Seytmemetovnıñ. Tintüv «Qırım birdemliginiñ» sabıq faali Seytumer Seytumerovnıñ evinde de keçirildi. O, bir qaç yıl evelsi Qırımnı terk etti.
Enver Mustafayev sorğudan soñ yiberildi. Seytumer Seytumerov (d.s. 1988), Amet Suleymanov (d.s. 1984), Rustem Seytmemetov (d.s. 1973), Osman Seytumerov (d.s. 1992) Rusiye Ceza kodeksiniñ 205.5 maddesiniñ ekinci qısmına istinaden (Terror teşkilâtınıñ faaliyetini teşkil etüv ve bu teşkilâtnıñ faaliyetinde iştirak etüv) qabaatlana. 2018 senesinden berli Qırımda olmağan Seytumer Seytumerov Rusiye Ceza kodeksiniñ 205.5 maddesiniñ birinci qısmına istinaden qabaatlana.
Qırım Muhtar Cumhuriyeti ve Aqyar prokuraturası martnıñ 11-nde Bağçasarayda ve Bağçasaray rayonında Rusiye quvetçileri keçirgen tintüvlerden sebep cinaiy tahqiqat başlattı. Daa soñra müessise daa bir cinaiy tahqiqat başlatılğanını bildirdi – o, tintüvlerden soñ qırımtatarlarnıñ tutuluvınen bağlıdır.
Ukraina Tış işler nazirligi, martnıñ 11-nde olıp keçken tintüvlerge qarşı narazılıq bildirdi.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
