Ukraina aq qorçalayıcı teşkilâtları gruppası halqara teşkilâtlarnı ve çetel devletlerniñ ükümetlerini «işğal etilgen Qırımda insan aqlarını muntazam sürette sert bir şekilde bozğan Rusiyege qarşı sanktsiyalarnı quvetleştirmelerine» çağıra.
Bu aqta aq qorçalayıcılarnıñ martnıñ 11-nde Bağçasarayda ve Bağçasaray rayonında yaşağan qırımtatarlarnıñ evlerinde Rusiye FSBsi keçirgen kütleviy tintüvleri ve insan tutuvlarınen bağlı beyanatında aytıla.
«Bu siyasetnen bağlı daa bir apis cezası kampaniyası, qırımtatarlarğa, hususan «Qırım birdemligi» teşebbüsiniñ faallerine qarşı yapıla. Qırımda kütleviy tintüvler dalğası başlandı ve qırımtatarlar muntazam sürette taqip etile», – dep aytıla beyanatta.
Aq qorçalayıcılar, Rusiye ükümetinden ve Kreml kontrolindeki Qırım akimiyetinden «tutulğan qırımtatarlarnı acele azat etmesini, Qırımda faallerni tutqan ve olarğa qarşı küç qullanğanlarğa qarşı operativ, semereli ve tarafsız tahqiqat yapmalarını, ve qabaatlılarnı mesüliyetke çekmelerini» talap ete.
Beyanatta aq qorçalayıcılar «ileride böyle areketlerniñ ögüni almaq, daa evel qanunsız tutulğanlarnı azat etmek ve qırımtatarlarnıñ taqibini toqtatmaq içün tedbir almağa da» talap ete.
«Qırımtatar halqınıñ vekilleri, hususan «Qırım birdemliginiñ» faalleri, Ukraina tarafdarı faalleriniñ taqip etilüvini toqtatmaq içün halqara teşkilâtlarnı ve çetel devletleriniñ ükümetlerini Rusiye ükümetine qarşı basqı yapmağa devam etmelerine çağıramız. Advokat, aq qorçalayıcı ve vatandaş faallerini taqip etmek içün terrorizm ve ekstremizm ile küreş qanunlarınıñ Rusiye tarafından qullanıluvını takbih etmege çağıramız», – dep aytıla aq qorçalayıcılarnıñ beyanatında.
Rusiye quvetçileri martnıñ 11-nde saba Bağçasaray ve Bağçasaray rayonında yaşağan qırımtatarlarnıñ evlerine tintüv keçirmege keldi, advokatlar kirsetilmedi.
Tintüvler çerçivesinde quvetçiler ATR telekanalınıñ jurnalisti Seytumer Seytumerovnıñ evine de keldi. O, 2017 senesinden berli esas Ukrainada yaşay. Jurnalist, quvetçiler silâ ve edebiyat qıdırdı, dep bildirdi.
Qırımlı aq qorçalayıcı Lutfiye Zudiyevanıñ Qırım.Aqiqatqa bildirgenine köre, martnıñ 11-nde qırımtatarlarnıñ evlerinde Rusiye FSB hadimleriniñ teşebbüsinen bir sıra tahqiqat tedbiri başlatıldı. Yedi tintüv keçirildi, beş kişi tutuldı: Enver Mustafayev, Seytumer Seytumerov (tarihçı – QA), Osman Seytumerov, Amet Suleymanov, Rustem Seytmemetov. Olarnı FSB bölügine alıp ketkenler.
Advokatlarnıñ tarif etkenine köre, tutulğan dört qırımtatarı Rusiyede ve işğal etilgen Qırımda terror teşkilâtı olaraq tanılğan «Hizb ut-Tahrirde» iştirak etkeninden şübheli sayıla. Bu aqta daa soñra Rusiye FSBsi de bildirdi.
Qırım Muhtar Cumhuriyeti ve Aqyar Prokuraturası ve Milliy politsiyası martnıñ 11-nde Bağçasarayda ve Bağçasaray rayonında Rusiye quvetçileri keçirgen tintüvlerden sebep cinaiy tahqiqat başlattı. Daa soñra müessise daa bir cinaiy tahqiqat başlatılğanını haber etti – tintüvlerden soñ qırımtatarlarnıñ tutulmasınen bağlı.
Ukraina Tış işler nazirligi martnıñ 11-nde olıp keçken tintüvlerge qarşı «narazılıq» bildirdi.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
