Bu bazar künü, oktâbrniñ 28-ne, keçer gecesi Ukraina «qış vaqtına» keçecek. Saat aqrepleri bir saat keri alınacaq. Keçiş Kyiv vaqtına köre saba saat dörtte olmalı.
Vaqıt deñiştirilmesi 1996 senesi Nazirler Şurası qabul etken Ukrainada vaqıt esaplama tertibine dair nizamnamede belgilengen.
Er yıl yaz ve qış vaqtına keçüv al-azırda aman-aman 75 memlekette qullanıla. Tahminen 180 memleket saat aqreplerini deñiştirmey.
Yaz vaqtına qoltutqanlar dey ki, kün ışığınıñ saatları yazda energiyanı iqtisat etmege ve semerelilikni arttırmağa yardım ete. Qarşı çıqqanlar ise insanlarnıñ sağlığına menfiy tesir olğanını ayta.
Sentâbrniñ 12-nde Avropa komissiyası Avropa Birligi memleketlerine 2019 senesinden başlap yaz ve qış vaqtına mevsim keçişini lâğu etmege teklif etti.
Tekliflerge köre, Avropa Birliginde saatlar deñiştirilmeycek. Amma aza memleketlerine qış ya da yaz vaqtına köre yaşaycaqlarını qarar almağa imkân berile.
Ukrainada Avropa Birligi ve Avropa memleketleriniñ çoqusında olğanı kibi vaqıt yılda eki kere deñiştirile: martnıñ soñki bazar künü memleket yaz vaqtına keçe, oktâbrniñ soñki bazar künü ise qış vaqtına qayta.
Oktâbr-mart ayları arasında işğal etilgen Qırım ve esas Ukraina arasında bir saat farq bar, çünki qomşu Rusiye yaz ve qış vaqtına keçmekten vazgeçti.
