Link açıqlığı

Saatnıñ esas haberi

«Bayraq ile birleştirilgen»: bütün dünyada ukrainler Qırım qaytması oğrunda küreşkeni içün


Qırımnı işğalden qurtarmaq içün bütün dünya cemaatçılığı kün-künden daa faal tarzda qoşula. Hususan, çeşit-türlü memleketlerniñ uquq qoruyıcıları ve faalleri #LIBERATECRIMEA cemaat areketinde birleşti. Bu birleşmeniñ teşebbüsinen «Bayraq ile birleştirilgen» aktsiyası keçirile. Aktsiyanıñ yolbaşçısı Nikolay Krutsik onıñ hususiyetleri aqqında Qırım.Aqiqatqa intervyüde aytıp berdi.

- Nikolay, özüñiz aqqında oquyıcılarımızğa biraz aytıp beriñiz.

- Menimce, özün içün aytmağa ya da yazmağa pek qıyın. Daa yahşısı, men aqqında, keçmişte ve bugünde faaliyetimni bilgen ya da közetken adamlar yazsa ya da aytsa.

Aytayım tek, daa 2000-inci yıllarda aman-aman bütün qorantam çetelge ketmege mecbur edi, çünki daa o vaqıtları ailemniñ azaları Ukrainanıñ o akimiyetiniñ siyasetinen razı degil edi. Bu babam Roman Kruitsniñ siyasiy faaliyeti ve ilâhre.

- Qorantañız qaysı memleketke ketti?

- Apaymnen men 2001 senesi İrlandiyağa keldik. Bir qaç yıl biz öz şahsiy ayatımıznı yoluna qoya edik: oquş, iş, til ögrenmesi - raat ve tınç yaşayış içün kerekli şeyler. Amma bizge vatanperver duyğusını aşılağan Ukraina, nenkâ aqqında hatırlavlar, İrlandiyada yaşağan ukrainlerni tapıp birleştiemekke bir itev oldı. İşte böyle, o vaqıtları mında az sayıda olğan ukrain vataperverleriniñ iştiragınen, İrlandiyada ilk ukrain birleşmeleri, topluluqları, cemiyetler peyda olıp başladı.

- “Bayraq ile birleştirilgen” aktsiyası - bu ne?

- “Bayraq ile birleştirilgen” aktsiyası 2017 senesi başlandı. İrlandiyada Ukraina elçiliginde ukrain cemiyetlerniñ toplaşuvı keçti, anda bütün dünyanıñ ukrainlerini birleştirecek aktsiyanı başlamaq teklif etildi. “Bayraq ile birleştirilgen” aktsiyasını başlamaq ğayesi böyle peyda oldı. 2017 senesi aktsiyanıñ deñev versiyası bir qaç Avropa memleketini qaplap aldı. Bu yılı ise aktsiyağa endi dünyanıñ 20-den ziyade memleketi qoşuldı. Aktsiyada iştirak etmege istegen memleketlerniñ sayısı büyük olğanı içün, koordinatorlar eki bayraqnı yürsetmege qarar aldı: birincisi Avropanı kezdi, ekincisi ise qıtalarnı. Ukraina devlet bayrağı kününde olar Kyivde rastkelişti. Aktsiya aqqında haber keñ tarqaldı ve, esası, kerçekten dünyanıñ bir çoq ukrain ve qırımtatar cemiyetlerini birleştirdi.

- Qırımtatar bayrağınıñ iştiraginen yañı aktsiya#LIBERATECRIMEA areketiniñ bir parçsımı?

- Ebet. Qırımtatar ve ukrain topluluqlarnı birleştirgen “Bayraq ile birleştirilgen” aktsiyasını keçirgenimizden soñ, qırımtatar Milliy Meclisiniñ azası Eskender Bariyevden belli oldı ki, Qırımnı işğalden boşatmaq içün #LIBERATECRIMEA halqara cemiyet areketi öz işini başlay.“Bayraq ile birleştirilgen” leyhası büyük isteknen bu işke qoşuldı. Biz, #LIBERATECRIMEA areketi çerçivesinde yañı aktsiya başlap, qırımtatar bayrağını, qırımtatarlar ve ukrainler yaşağan dünyanıñ bütün köşelerine seyaatqa yollamaq teklif ettik.

Акция «Объединенные флагом»
Акция «Объединенные флагом»

- #LIBERATECRIMEA areketiniñ taqımı - bu kimler?

- Bu vatanperverler, aqıllı ve ikmetli adamlarnıñ küçlü taqımı, ve esası - olarnıñ çoqusı - Ukrainanı sevgen yaşlar. Areket iştirakçileri, Qırımnı Ukraina terkibine qaytarmaq içün ve ilhaq etilgen Qırımdan çıqmağa mecburlanğanlar öz Ana-Vatanına qaytıp olsunlar dep er şeyge azırlar.

- #LIBERATECRIMEA areketi ve, hususan,“Bayraq ile birleştirilgen” aktsiyasınıñ maqsatları ne?

Areket iştirakçileri, Qırımnı Ukraina terkibine qaytarmaq içün ve qırımtatarlar öz Ana-Vatanına qaytıp olsunlar dep er şeyge azırlar

​- Birinciden, Qırım Ukraina terkibinde olğanı ve olacağını dünya topluluğına bildirmek. Onıñ tamır halqı - qırımtatarlar - tam uquqlı Qırım sakinleri ve Ukraina vatandaşları olğanını bildirmek. Rusiyeniñ tarafından, bir tecavuzcı devlet olaraq, alâ daa telüke bar olğanını köstermek. Rusiyeni, bütün işğal etilgen Ukraina topraqlarını qaytartmaq ve insaniyetke qarşı yapqan bütün cinayetleri içün cevap berdirtmek tek dünya topluluğınıñ iştirakinen mümkün olğanını yayınlamaq.

- #LIBERATECRIMEA areketiniñ ne yeñişleri endi bar?​

- #LIBERATECRIMEA areketi azalarınıñ ilk kenleştirilgen körüşüvi oktâbr 12-14 künleri Kyivde keçirildi. Körüşüvde, Qırımda insan aqları qorumaq ve Qırımnı işğalden boşatmaq içün çeşit yönelislerniñ variantlarını işletip çıqardılar. Tedbirde türlü saalar vekilleri iştirak etti: siyasetşınaslar, göñülliler, çetel memleketlerdeki ukrain ve qırımtatar cemiyetleriniñ azaları, jurnalistler ve, elbette ki, doğrudan-doğru Qırımnen ve umumen Ukrainanen bağlı olğan gençler. Areket, ilhaq etilgen Qırimda da endi özüni muvafaqiyetli köstergenini aytıp berdiler.

- “Bayraq ile birleştirilgen” aktsiyası şimdi nasıl keçe?

- “Bayraq ile birleştirilgen” - #LIBERATECRIMEA aktsiyası daa oktâbr ayında işini başladı. Qırımtatar bayrağı Avstraliyadaki ukrainlerge yollanıldı. Şimdilik bayraq Avstraliyanıñ büyük şeerlerini kezine, ve aktsiyağa Avstraliyada yaşağan başqa memleketler vekilleriniñ cemiyetlerini de celp ete.

Noyabr ayında bayraqnı AQŞ, Kanada ve Argentinada qarşılacaqlar. Yanvarniñ 18-inde İrlandiyadaki ukrain cemiyeti aktsiya keçirmek icün bayraqnı alacaq, soñ ise o daa 20-ge qadar Avropa ve Asiya memeleketlerini dolanacaq.

Bayraq ziyaret etecek soñki ülke İsrail olacaq. Tamam mayısnıñ 31-ine İsrailniñ ukrain cemiyetleri bayraqnı qarşılap, bir sıra aktsiyalarnı keçirece, ondan soñ bayraqnı Ukrainağa, tamam Qırımtatar milliy bayraq kününiñ Kyivde qutlanmasına ketirecekler. İyün 26-sına Qırımtatar bayraq künü bayramına, er iştirak etken ülkeden qırımtatar ve ukrain cemiyetlerniñ vekilleri kelecek.

- Komandañıznıñ daa ne planları bar?

- Tecavuzcı - Rusiyenen cenk ketken zamanda uzun müddetli planlar tizmek qıyın. Taqımımız çalışqan ilk yöñelişleri - rusiye apishanelerinden ukrain ve qırımtatar siyasiy mabüslerniñ azat etilmesi, Qırımnıñ işğalden boşatılması ve işğalcilerden Ukraina şarqında topraqlarnıñ serbest etilmesi, insan aqları, hususan işğal etilgen topraqlarda, qoruvı.

XS
SM
MD
LG