Aqyar civarındaki Baydar uva sakinleri quruğan Turist qıynağı yerinde raatlıq alanı qurulacaq, dep qorqa. Rusiye tarafdarı faal Lenur Usmanov Qırım.Aqiqat Radiosınıñ yayınında bent tamiri bu yerlerde qurulacaq inşaatlar planlarını taptı, dep bildirdi.
«Ğayrıdan tiklev işleri başlağan soñ, aytqanları kibi, prokuror ya da Sevprirodnadzor hadimi kelip, olarnı blok etti ve ekspertiza yapılmasını talap etti. Onı yarım yıl devamında yapalar. Amma suv yibermeyip, başta ekspertiza yapsa edik, bentni yuvıp alıp ketecek edi ve Baydar (Orlinoye – QA) köyüniñ aşağı maallesini suv basar edi, şunıñ içün tez areket etmege qarar alğan edik. Soñra işler toqtatıldı ve Aqyar ükümeti daa Dmitriy Ovsânnikov olğanda gölümizni «Azbuka turizma» adlı bir şirketke raatlıq alanını qurması içün bergenini ögrendik. Yani göl qapatılacaq ve anda çoq qatlı evler ya da kottecler qurulacaq», – dep tarif etti Usmanov.
«Azbuka turizma» şirketi ve Dmitriy Ovsânnikov bunı şimdilik izaatlamaylar.
Yerli sakin Vladimir NTS Aqyar telekanalına izaat berip, qıynaq quruğan soñ quyularda suv qalmadı, Aqyar akimiyeti ise olarnı terenleştirüvde yardım etmege istemedi, dep ayttı. Qırımlı ekolog Margarita Litvinenkonıñ fikirince, bu vaqialar kerçekten bağlı ola bile.
«Qıynaq suvı filtrden keçip, yerastı suvlarını ve quyularnı toldurğan edi. Amma daa 2015 senesi bu qıynaqtan bir şey qalmadı, pek az suv bar edi. Şimdi qıynaqlarnıñ vaziyeti dağıtuv ola. Olarnı mezattan pek ucuz satalar. Bir qıyaslav yaptım: 2019 senesi mart ayında Turist qıynağı 302 biñ rublege satıldı», – dedi ekolog.
Aqyarnıñ Rusiye parlamenti, kelecek afta Baydar uvasında şeer qurucılığı ve topraq meseleleri komitetiniñ toplaşuvı keçirilecek, dep bildirdi. Deputatlar problemli obyektni baqır, sakinlernen körüşmege planlaştıra.
