Ukrayina Baş istihbarat idaresiniñ menbası BBC-niñ Rus hızmetine, Rusiyeniñ uzaq radiolokatsiya keşif uçağı A-50, S-200 zenaat-raketa kompleksiniñ raketi ile urıp tüşürilgenini tasdıqladı.
Daa evel Ukrayina mudafaa quvetleri sovet ZRK S-200-den Rusiye A-50 uçağını urıp tüşürgenleri aqqında "Ukrainskaya pravda" neşiri öz menbalarına atıf etip yazğan edi. Neşirniñ subetdeşlerinden biri, fevralniñ 23-nde urıp tüşürilgen uçaqta 10 adam elâk oldı, dep iddia ete.
"Uçaqta olğan bütün 10 rusiyeli elâk oldı. Olarnıñ arasında - beş mayor, üç kapitan, praporşçı ve leytenant", - dep bildire "Ukrainskaya pravda" menbasınıñ sözlerini.
Bu malümatnıñ mustaqil tasdıqı yoq. Rusiye Mudafaa nazirligi malümatnı izaatlamadı.
Ukrayina mudafaa quvetleriniñ menbaları, rusiyeli A-50 uçağı Azaq deñizinde ukrayin arbiyleri tarafından urıp tüşürilgenini bildirdiler. Rusiye cenkke qoltutqan blogerleri "dost ateş" aqqında yazalar.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
