Rusiyeliler Qırım yarımadasından qaçmağa azırlana, bunı bir çoq indikator köstere, dep bildirdi Qırımtatar resurs merkeziniñ idare yolbaşçısı, Qırımtatar Milliy Meclisiniñ azası Eskender Bariyev «Apostrof» neşirine bergen intervyüsında.
«Bunı (rusiyelilerniñ qaçacağını – QA) tasdıqlağan indikatorlar bar. Birinciden, bizim OLX kibi Avito saytları bar. Anda 2-3 yıl evelsi alınğan tehnika çoq satılıp başlandı. Nevbetteki indikator – bizge kelgen malümatqa köre, bir çoq işbirlikçi – rusiyeliler degil, işbirlikçiler üçünci memleketlerde mülk satın alıp başladı. Meselâ, Türkiyede. Olarnıñ Ukrayına pasportları yoq, başqa memleketlerge barıp olamaylar. Rusiye pasportlarınen Türkiyege kelip, ev almağa tırışalar. Kerçekten, Türkiyede rus rayonları bar. Anda da bir şeyler begenmeyler, camiler çalışmasın, dep ayta ekenler», – dedi Bariyev.
Bariyevniñ aytqanına köre, Qırımda qurucılıq işi toqtatıldı. Onıñ malümatına köre, yarım yıl – bir yıl evelden añlaşqan mütehassıslarnıñ işi yoq. Bariyevniñ fikirince, qurucı şirketler «Ukrayına mudafaa quvetlerini beklep», qurucılıq yapmağa qorqa.
Fevralniñ 24-nde Ukrayına prezidenti Volodımır Zelenskıy memleket Qırımnıñ işğalden qurtarıluvına azırlana, dep bildirdi.
Ukrayına prezidenti ofisiniñ yolbaşçı muavini İğor Jovkva Qırım.Aqiqatqa intervyü berip, Ukrayınanıñ er angi toprağınen bağlı uzlaşuvlar bir vaqıt Rusiyenen muzakere etilmeycek, dep ayttı. Onıñ qayd etkenine köre, kimse Qırım Kyivniñ kontroli altına nasıl qaytarılır aytıp olamay, amma «qaytarılacaq». Onıñ aytqanına köre, «(Qırımnı qaytaruv) diplomatik yoluna arbiy vastalar» qoşula bile.
ABD devlet kâtibiniñ muavini Viktoriya Nuladn Amerika Birleşken Devletleri Ukrayınanıñ işğal etilgen Qırımdaki Rusiye arbiy obyektlerine darbe endirmesine qoltuta, dep bildirdi. Buña cevap olaraq Peskov Nulandnıñ Qırım darbeleri lafları «Washingtonnıñ halqara kerginlikniñ baş provokator rolüni qayd ete», dep bildirdi.
Bıltır dekabr ayınıñ soñunda Ukrayına arbiy istihbarat yolbaşçısı Kırılo Budanov Ukrayına Qırımnı em küç, em diplomatiyanen keri alacaq, dep bildirdi.
Ukrayına Silâlı quvetleriniñ baş komandanı Valeriy Zalujnıy Qırımnı işğalden azat etüv imkânlarına qıymet kesip, birinciden Zaporijjâ vilâyetiniñ Melitopol şeerini kontrol altına almaq kerek, dep bildirdi.
Avropada ABD ordusınıñ sabıq komandanı Ben Hoces Ukrayına Qırımnı 2023 senesi yaznıñ soñuna qadar azat etecek, dep bildirgen edi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
