İşğal etilgen Qırımda Rusiye Federatsiyası prezidenti saylavlarınıñ repetitsiyası keçe, dep bildirdi Qırımtatar resurs merkeziniñ başı Eskender Bariyev.
"Sistemanı deñeyler. Uzaqtan rey berilgen vaqıtta azamiy yükleme nasıl ola bilecegi baqıla. Aqmescit şeerinde 10 300 adam iştirak etecegi beklenile, 18+", - dep yazıla bildirmede.
Berilgen malümatqa köre, bu deñevde iştirak ariza berüv yolunen keçirile eken. Soñra Devlet hızmetler portalında kerçeklikni tasdıqlamaq kerek eken.
Bu buyurıq Qırımnıñ devlet müessiselerine ve mekteplerge talebelerniñ ana-babalarına kelgen.
Bariyevniñ sözlerine köre, bu, uzaqtan rey berüv sistemasınıñ deñep baqmaqılması, büyük sahtelev içün şahsiy malümatnıñ toplanılması ve ealiniñ evelden azırlanılması maqsadınen yapıla eken.
Evel Vladimir Putin RF prezidenti saylavları qanunına deñişmeler kirsetken edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
