ABD ve Ukrayina arasındaki munasebetlerniñ toqtatıluvına baqmadan, Avropa Şurası Ukrayinanıñ halqara seviyede tanılğan sıñırları çerçivesinde mustaqilligi, suvereniteti ve topraq bütünligine öz devamlı ve sarsılmaz destegini tasdıqlay. Bu aqta Avropa Birligi sammitiniñ neticeleriniñ leyhasında aytıla — vesiqanıñ metni Azatlıq Radiosınıñ muarririyetinde bar.
Bütün taraflı, adaletli ve turğun barışıqqa ketirmek kerek olğan muzakereler içün "yañı impuls"nı köz ögüne alıp, AB ateş toqtatıluvınıñ yalıñız bütün taraflı barışıq añlaşmasına yol açqan esnasnıñ bir qısmı olaraq ola bilecegini ve er angi barışıq añlaşmasınıñ ileride Rusiye tecavuzını toqtatmağa yardım etecek Ukrayina içün telükesizlik kefaletleri ile beraber olması kerekligini qayd ete. Barışıq Ukrayinanıñ mustaqilligi, suvereniteti ve topraq bütünligine ürmet etüvge esaslanmalı.
Vesiqada qayd etile ki, Ukrayina ve Avropa olmadan Ukrayina boyunca iç bir muzakereler olmaycaq.
"Küç vastasınen barışıqqa irişmek içün Ukrayina öz küçlü arbiy ve mudafaa imkânlarına saip olmaq kerek. Bu, cenkni toqtatmaq içün muzakerelerden evel, cenk vaqtında ve soñra olğan müddetke ait. Bu maqsatnen AB, fikirdeşleri ve ittifaqdaşları ile koordinatsiya yapıp, Ukrayinağa siyasiy, maliyeviy, iqtisadiy, gumanitar, arbiy ve diplomatik destek köstermege ve Rusiyege tecavuzcı cenkni devam ettirmek qabiliyetini zayıflatmaq içün basqı quvetleştirmege azırlar", — dep aytıla Azatlıq Radiosında mevcut olğan AB sammitiniñ beyanatında.
Bundan da ğayrı, qayd etile ki, Avropa Birligi Ukrayinağa muntazam ve tahmin etilgen maliyeviy destek köstermege devam etecek — 2025 senesi Ukrayinağa 30,6 milliard yevro ayırılacaq, şu cümleden Ukrayina Facility programması boyunca ödemeler 12,5 milliard yevro olacağı beklenile.
Ukrayinanıñ özüni semereli qorçalamaq qabiliyeti "kelecek telükesizlik kefaletleriniñ ayırılmaz parçasıdır", şunıñ içün AB aza devletleriniñ Ukrayinanıñ acele arbiy ve mudafaa ihtiyaclarını temin etmege devam etmege azır olğanlarını alğışlay ve Şuranı Ukrayinanıñ arbiy destekini quvetleştirmek içün AB tarafından yapılğan teşebbüslerni ileriletmege çağıra.
Telükesizlik kefaletleri "Ukrayina, em de onıñ fikirdeşleri ve transatlantik ortaqlarınen" mesleatlaşmaq kerek, dep qayd etile sammit neticeleriniñ leyhasında.
Avropa Birligi liderleri martnıñ 6-nda Ukrayinağa ve Avropa mudafaasına qol tutuvnı devam ettirmek içün mahsus sammitke toplaşacaqlar. Hususan, AB liderleri Ukrayinada barışıqnıñ temin etilmesi içün zarur olğan havfsızlıq kefaletlerine Avropa qoşqan issesini muzakere etecekler.
Martnıñ 2-nde Londrada Ukrayinağa bağışlanğan sammit olıp keçti. Ukrayina prezidenti Ofisiniñ malümatına köre, körüşüvde 18 devlet ve ükümet yolbaşçısı, halqara teşkilâtlarnıñ reberleri iştirak etti. Liderler Ukrayina mudafaa sanayısına maliyeviy destekniñ devam etüvini ve telükesizlik kefaletlerini muzakere ettiler.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
