Rusiye koloniyasında siyasiy mabüs Volodımır Baluhnıñ sağlıq vaziyeti fenalaştı, amma diagnozını alâ daa aytmadılar. Bu aqta Qırım aq qorçalayıcı gruppası 2019 senesi iyülnñ 17-nde ukrainalını ziyaret etken advokat Olga Dinzeniñ malümatına esaslanıp haber ete.
Advokatnıñ bildirgenine köre, Volodımırnıñ büyrekleri ağıra, şişikler sıqlaştı, amma mustaqil ekim ve psiholog koloniyağa alâ daa kirsetilmey.
Olga Dinze, Baluhqa açlıqtan soñ kerek olğan erzaqnı bermege imkân yoq, çünki ukrainalı kamera şeklindeki odağa avuştırıldı, dep haber etti.
«Oña tek yañı közlük berip oldıq. Koloniyağa ekim ve psiholognıñ kirsetilmesini talap etemiz ve Baluhnıñ vatandaşlığınen bağlı tafsilâtlarnı ögrenemiz», – dedi advokat.
İyülniñ 12-nde Dinze koloniyada Volodımır Baluhqa açlıqtan sağlığı içün zararsız çıqmaq içün kerek olğan aşlar qabul etilmedi, dep bildirgen edi.
İyülniñ 5-nde Qırım aq qorçalayıcı gruppası Rusiyede mahküm etilgen qırımlı ukrain faali Volodımır Baluh «talapları yerine ketirilgeni içün» açlıqnı toqtattı. Rusiyeniñ Torjok şeerindeki №4 koloniyada Baluhnı Ukraina konsulı ziyaret etti.
İyünniñ 28-nde advokat Olga Dinze Baluh yuqlamay ve suv içmey, dep ayttı.
Bundan bir qaç kün evelsi ukrainalı faal Volodımır Baluh Tver vilâyetiniñ koloniyasındaki ceza izolâtorına qapatıldı. Daa evel Baluhnı ceza izolâtorına avuştırğanda anda o, aman-aman eki ay bulundı. Soñra onı apishane hastahanesine avuştırğan ediler.
2018 senesi martnıñ 19-nda Volodımır Baluh açlıqqa başlağan edi. Bir aydan ziyade bir şey aşamağan Baluh Arhiyepiskop Klimentni diñlep, kisel içmege, peksimet aşamağa razı olğan edi. Daa soñra mahküm etilgen ukrain faali açlıqnı vaqtınca toqtatmağa qarar aldı.
Advokatlarnıñ malümatına köre, 200 künden çoq açlıq tutqan Baluhnıñ ülser ve pankreatit şübesi peyda oldı.
Volodımır Baluh – qırımlı çiftçi, ukrainalı cemaat faali, Ukrain milletçileri kongressiniñ azası. Rusiye Qırımnı ilhaq etken soñ Rusiye vatandaşlığından vazgeçti. 2013 senesi qışta evinde Ukraina bayrağını astı, daa soñra «Sema Yüzü qaramanları soqağı» levhasını tikledi.
2016 senesiniñ soñunda Volodımır Baluhnı Rusiye FSBsiniñ hadimleri tutıp aldı. Olar Baluh yaşağan evniñ çardaqında 90 patron ve bir qaç trotil taş tapılğanını bildirgen edi. Rusiye kontrolindeki Qırım mahkemesi onı 5 yılğa azatlıqtan marum etti – eki cinaiy dava boyunca: silâ saqlaması ve «Aqşeyh vaqtınca tutuv izolâtorınıñ yolbaşçısını köteklev» dep adlandırılğan adise.
Baluh qabaatını tanımayıp, açlıqqa başlağan edi. Baluhnıñ imayesi ve aq qorçalayıcıları onıñ Ukrainağa qoltutqanı içün repressiyalarnıñ qurbanı oldı, dep tüşüneler. «Memorial» aq qorçalayıcı merkezi Volodımır Baluhnı siyasiy mabüs olaraq tanıdı.
