Ukrain faal Volodımır Baluh ve izolâtornıñ sabıq başlığı Valeriy Tkaçenko arasında Aqşeyh (Razdolnoye) izolâtorında olğan çatışmanıñ videosı Qırım.Aqiqatnıñ eline tüşti. Bu adiseden soñ Tkaçenko, Baluh onı sanki urdı, dep ayttı, bunıñ içün qırımlığa ekinci apis müddeti üküm etildi.
Közetüv kameralarında video Baluhnıñ dava malümatına qoşulğan edi, onı mahkemede köstergen ediler.
"Anda Tkaçenko, Baluhnı arqasına urğanı açıq-aydın körüne. Bundan soñ Baluhnıñ tabiiy reaktsiyası oldı: seni arttan ursalar, refleks peyda ola. Ve o (Baluh - QA), elinen salladı", - dep tefsir ete davanı Baluhnıñ advokatı Olga Dinze.
Baluhnıñ aytqanına Tkaçenkonıñ açıq tefsirleri yoq.
Volodımır Baluhqa qarşı ekinci cinaiy dava 2017 senesi avgust ayında açıldı, o zaman izolâtornıñ başlığı olğan Valeriy Tkaçenko, Baluh saba teşkerüvi vaqtında oña atıldı, dep iddia ete edi. Baluh ise mahkemede, Tkaçenko başqa hadimlerniñ ögünde onı bir qaç kere urdı, dep ayttı. Amma ukrainni qabaatlı saydılar.
Birinci sefer bu video Qırım.Aqiqatnıñ Volodımır Baluh aqqında filminde kösterilgen edi.
