Qırımda mahküm etilgen ukrain faali Volodımır Baluhnıñ tuvğanları ve advokatlarına qayda bulunğanını yarım aydan berli tam olaraq aytmaylar. Bu aqta Baluhnıñ ömür arqadaşı Natalya Qırım aq qorçalayıcı gruppasına bildirdi.
«Volodâ içün qasevetlenemiz, sıcaq urbası yoq, avuştırılması ögüne Aqmescit SİZOsında menden aş ve urba almadılar. Aşqazan problemleri bar, uzun açlıqtan sebep alı zayıf. Anda ne aşay, aşaymı aslı, bilmeyim», – dep tekrarlay Natalya Baluhnıñ aytqanlarını Qırım aq qorçalayıcı gruppası.
Fevralniñ 28-nde Baluhnıñ advokatı Olga Dinze, onıñ malümatına köre, ukrain faali Rusiyeniñ Tver vilâyetindeki umumiy rejim koloniyalarından birine avuştırıla, dep bildirgen edi. Lâkin Baluh avuştırılğan koloniyanı bilmey. Advokatnıñ bildirgenine köre, Tver vilâyetiniñ koloniyaları mabüslerge sert yanaşuv adiselerinen belli.
Rusiyeniñ Cezalarnı yerine ketirüv federal hızmetiniñ Baluhnıñ tutulğan yeri ve şaraitlerine dair açıq izaatları yoq.
Qırım aq qorçalayıcı gruppası Baluh Aqmescit SİZOsından qomşu Rusiyedeki Krasnodarğa aç ve eşyasız avuştırıldı, dep bildirgen edi.
Rusiye insan aqları vekâletlisi Tatyana Moskalkovanıñ bildirgenine köre, Qırımda mahküm etilgen Baluhnıñ Rusiye koloniyasına avuştırılması bir ay sürecektir.
Kreml kontrolindeki Qırım Yuqarı mahkemesi ukrain faali Volodımır Baluhnıñ imayesine cezası müddetiniñ ğayrıdan baqıluv muracaatını red etti. Kreml nezaretindeki Qırım Yuqarı mahkemesi Volodımır Baluhnı 4 yıl ve 11 ay umumiy rejim koloniyasında qalmasına ve 10 biñ ruble (tahminen 4 biñ ğrıvnâ) para cezasını ödemesine üküm etti. Faal eki cinaiy iş boyunca tevqif etildi.
2018 senesi martnıñ 19-nda Volodımır Baluh açlıqqa başlağan edi. Bir aydan ziyade bir şey aşamağan Baluh Arhiyepiskop Klimentni diñlep, kisel içmege, peksimet aşamağa razı olğan edi. Daa soñra mahküm etilgen ukrain faali açlıqnı vaqtınca toqtatmağa qarar aldı. Advokatlarnıñ malümatına köre, 200 künden çoq açlıq tutqan Baluhnıñ ülser ve pankreatit şübesi peyda oldı.
FSB, Volodımır Baluhnı 2016 senesi dekabrniñ 8-nde tuttı. FSB hadimleri Volodımır Baluh yaşağan evniñ çardaqında 90 patron ve bir qaç trotil taş tapılğanını bildirgen edi. Baluhnıñ imayesi ve aq qorçalayıcıları onıñ Ukrainağa qoltutqanı içün repressiyalarnıñ qurbanı oldı, dep tüşüneler. Onıñ evinde Ukraina bayrağı bar edi.
«Memorial» aq qorçalayıcı merkezi Volodımır Baluhnı siyasiy mabüs olaraq tanıdı. Aq qorçalayıcılarnıñ fikirince, faalni taqip etüv sebebi evinde tiklegen «Sema Yüzü Qaramanları soq., 18» levhası olğan.
