Advokat Olga Dinze mayısnıñ 7-nde Rusiyeniñ Tver vilâyetindeki Torjok şeeriniñ №4 tüzetüv koloniyasınıñ ceza izolâtorında tutulğan qırımlı ukrain faali Volodımır Baluhnı ziyaret etti. Onıñ sağlıq vaziyeti «pek fenalaştı», dep bildire Qırım aq qorçalayıcı gruppası.
«Ceza izolâtorında tek ötmek aşay ve suv içe. Advokatnıñ aytqanına köre, sağlıq vaziyeti pek fenalaştı. Ayaqları şişken, bunı birden köresiñ, büyrek hastalığınıñ işaretidir», – dep aytıla haberde.
Aq qorçalayıcılarnıñ malümatına köre, bu sefer ukrainalı ceza izolâtorından mayısnıñ 19-nda çıqmalı. Bu aqta koloniyanıñ memuriyeti haber etti.
Berilgen malümatqa köre, mayısnıñ 7-nde Ukrainanıñ Rusiye konsullığınıñ vekiline Volodımır Baluh ile körüşmege izin berilmedi. Koloniyanıñ hadimleri, Cezalarnı yerine ketirüv federal hızmetiniñ malümatına köre, Baluh Rusiye vatandaşı ola, dep bildirdi. Bunı tasdıqlaycaq bir de bir malümat berildi.
FSB, Volodımır Baluhnı 2016 senesi dekabrniñ 8-nde tuttı. FSB hadimleri Volodımır Baluh yaşağan evniñ çardaqında 90 patron ve bir qaç trotil taş tapılğanını bildirgen edi. Baluhnıñ imayesi ve aq qorçalayıcıları onıñ Ukrainağa qoltutqanı içün repressiyalarnıñ qurbanı oldı, dep tüşüneler. Onıñ evinde Ukraina bayrağı bar edi.
Kreml kontrolindeki Qırım Yuqarı mahkemesi ukrain faali Volodımır Baluhnıñ imayesine cezası müddetiniñ ğayrıdan baqıluv muracaatını red etti. Kreml nezaretindeki Qırım Yuqarı mahkemesi Volodımır Baluhnı 4 yıl ve 11 ay umumiy rejim koloniyasında qalmasına ve 10 biñ ruble (tahminen 4 biñ ğrıvnâ) para cezasını ödemesine üküm etti. Faal eki cinaiy iş boyunca tevqif etildi.
2018 senesi martnıñ 19-nda Volodımır Baluh açlıqqa başlağan edi. Bir aydan ziyade bir şey aşamağan Baluh Arhiyepiskop Klimentni diñlep, kisel içmege, peksimet aşamağa razı olğan edi. Daa soñra mahküm etilgen ukrain faali açlıqnı vaqtınca toqtatmağa qarar aldı.
