Rusiye koloniyasında tutulğan qırımlı ukrain faali Volodımır Baluh Ukraina ve Rusiye ombudsmenleri deñişken mabüsler cedvelleri boyunca azat etilecegine ümüt ete.
Bu aqta advokat Olga Dinze Qırım.Aqiqatqa tarif etti.
«O, (Denisovanıñ Moskalkova ile körüşüvini – QA) bile ve deñişüvge pek ümüt ete. Bilgenime köre, Baluh eki yıldan berli deñişüv cedvellerinde bar. Demek ki, tehnik ve siyasiy istek olsa edi, onı çoqtan deñiştirir ediler. Ukraina Yuqarı Radasınıñ saylavlarından evel siyasiy istek olacaqmı – bilmeyim. Deñişüv ya da başqa uquqiy protsedurağa oğraycaqlarnıñ sırasına kirecekmi – onı da bilmeyim. Amma cedvellerde bar», – dedi Dinze.
Ukraina ve Rusiye ombudsmenleri Lüdmila Denisova ve Tatyana Moskalkova iyülniñ 16-nda Moskvada keçirilgen körüşüvde eki memleketniñ SİZO ve apishanelerinde bulunğan ukrainalı ve rusiyelilerniñ cedvellerini deñişti.
Bundan evel ombudsmenler Kyivde körüşti. Rusiye ve Ukrainada tutulğan Ukraina ve Rusiye vatandaşlarınıñ azat etilüv meseleleri baqıldı.
Tatyana Moskalkovanıñ iyülniñ 15-nde bildirgenine köre, Ukrainada apiske alınğan 50 rusiyeliden 27-si azatlıqtan marum etüv yerlerinde qala, olardan 13-ü cezasını çeke, qalğanları – mahkeme qararlarını ya da istinaf neticelerini bekley.
Ukraina Tış işler nazirliginiñ malümatına köre, Rusiye 70-ten ziyade ukrainalını qanunsız alda tuta. Olarnıñ arasına 2018 senesi noyabr ayında Qara deñiz yalısı yaqınlarında Rusiye tarafından zapt etilgen 24 ukrainalı deñizci ve Donbastaki esirler kirmemekte.
Volodımır Baluh – qırımlı çiftçi, ukrainalı cemaat faali, Ukrain milletçileri kongressiniñ azası. Rusiye Qırımnı ilhaq etken soñ Rusiye vatandaşlığından vazgeçti. 2013 senesi qışta evinde Ukraina bayrağını astı, daa soñra «Sema Yüzü qaramanları soqağı» levhasını tikledi.
2016 senesiniñ soñunda Volodımır Baluhnı Rusiye FSBsiniñ hadimleri tutıp aldı. Olar Baluh yaşağan evniñ çardaqında 90 patron ve bir qaç trotil taş tapılğanını bildirgen edi. Rusiye kontrolindeki Qırım mahkemesi onı 5 yılğa azatlıqtan marum etti – eki cinaiy dava boyunca: silâ saqlaması ve «Aqşeyh vaqtınca tutuv izolâtorınıñ yolbaşçısını köteklev» dep adlandırılğan adise.
Baluh qabaatını tanımayıp, açlıqqa başlağan edi. Baluhnıñ imayesi ve aq qorçalayıcıları onıñ Ukrainağa qoltutqanı içün repressiyalarnıñ qurbanı oldı, dep tüşüneler. «Memorial» aq qorçalayıcı merkezi Volodımır Baluhnı siyasiy mabüs olaraq tanıdı.
