Kyivde "Qırım ailesi" qırımtatar medeniy tasil merkezi, oquv yınını tantanalı şekilde açtı. Tedbirni azat etilgen Qırım faalleri Volodımır Baluh ve Oleksandr Kolçenko ziyaret etti.
Bunı "Umma" Ukraina musulmanları diniy idaresiniñ müftisi Said İsmagilov öz Facebook saifesinde yazdı.
"Oquv yılınıñ açılışında pek istidatlı balalar milliy oyun ve türkülerni icra etti, şiir ayttı", - yazdı İsmagilov.
Onıñ yazğanına köre, Kolçenko ve Baluh, olar içün "Güzel Qırım" türküsini daa bir kere yırlamaqnı rica etti.
"Tedbirde olğan bütün musafirler, "Qırım ailesi"ne devlet destegi kerek dep ve tuvğan til, oyunlar, vokal, medeniyet ve tarihni örgenmek imkânı olsun dep, qırımtatar medeniy merkeziniñ yaratılması kerek, dep razı oldı", - qayd etti müfti.
Bayramğa Qırımtatatr Milliy Meclisiniñ reisi Refat Çubarov, Meclis reis müavini İlmi Ümerov, rusiye advokatı Nikolay Polozov, Ukraina prezidentiniñ Qırımda daimiy vekili Anton Korineviç ve başqa musafirler keldi.
