Qırımdamahküm etilgen ukrain faalci Volodımır Baluh Tver, Rusiye şeerinde SİZO kartserinde tutula, dep bildire jurnalist ve cemaat faali Viktoria İvleyeva Facebookta.
Onıñ aytqanına köre, SİZOğa “Açıq Rusiye” Rusiye areketiniñ koordinatorı Artöm Vajenkov barğan.
“Artöm Baluhqa yollanma berecek edi, amma onı qabul etmegenler ve Baluh kartserde bulunğanını bildirdiler”, - dep yazdı Dindze.
Bu malümatnı tasdıqlamaq içün Qırım.Aqiqat, Volodımır Baluhnıñ advokatı Olga Dinzege muracaat etti.
“Men bunı ne tasdıqlap, ne de red etip olam, çünki Baluhnen körüşmeyim. Kene de, laflarğa inanmaq iç bir sebebim yoq. Men yalıñız onı ziyaret etken soñ, vaziyetni aydınlata bilem. Amma bu eñ tezi bir aftadan olcaq”, - dedi Dinze.
Martnıñ 13-nde rusiyeli jurnalist ve cemaat faali Viktoriya İvleva işğal etilgen Qırımdan etap etilgen ukrain faali Volodımır Baluh Rusiyeniñ Yaroslavl şeerinde «tapıldı», dep bildirgen edi.
Yarım aydan berli Baluhnıñ tuvğanları ve advokatları onıñ bulunğan yerini tam olaraq bilmegen edi.
Fevralniñ 28-nde Baluhnıñ advokatı Olga Dinze, onıñ malümatına köre, ukrain faali Rusiyeniñ Tver vilâyetindeki umumiy rejim koloniyalarından birine avuştırıla, dep bildirgen edi. Lâkin Baluh avuştırılğan koloniyanı bilmey. Advokatnıñ bildirgenine köre, Tver vilâyetiniñ koloniyaları mabüslerge sert yanaşuv adiselerinen belli.
Qırım aq qorçalayıcı gruppası Baluh Aqmescit SİZOsından qomşu Rusiyedeki Krasnodarğa aç ve eşyasız avuştırıldı, dep bildirgen edi.
Rusiye insan aqları vekâletlisi Tatyana Moskalkovanıñ bildirgenine köre, Qırımda mahküm etilgen Baluhnıñ Rusiye koloniyasına avuştırılması bir ay sürecektir.
Kreml kontrolindeki Qırım Yuqarı mahkemesi ukrain faali Volodımır Baluhnıñ imayesine cezası müddetiniñ ğayrıdan baqıluv muracaatını red etti. Kreml nezaretindeki Qırım Yuqarı mahkemesi Volodımır Baluhnı 4 yıl ve 11 ay umumiy rejim koloniyasında qalmasına ve 10 biñ ruble (tahminen 4 biñ ğrıvnâ) para cezasını ödemesine üküm etti. Faal eki cinaiy iş boyunca tevqif etildi.
2018 senesi martnıñ 19-nda Volodımır Baluh açlıqqa başlağan edi. Bir aydan ziyade bir şey aşamağan Baluh Arhiyepiskop Klimentnidiñlep, kisel içmege, peksimet aşamağa razı olğan edi. Daa soñra mahküm etilgen ukrain faali açlıqnı vaqtınca toqtatmağa qarar aldı. Advokatlarnıñ malümatına köre, 200 künden çoq açlıq tutqan Baluhnıñ ülser ve pankreatit şübesi peyda oldı.
FSB, Volodımır Baluhnı 2016 senesi dekabrniñ 8-nde tuttı. FSB hadimleri Volodımır Baluh yaşağan evniñ çardaqında 90 patron ve bir qaç trotil taş tapılğanını bildirgen edi. Baluhnıñ imayesi ve aq qorçalayıcıları onıñ Ukrainağa qoltutqanı içün repressiyalarnıñ qurbanı oldı, dep tüşüneler. Onıñ evinde Ukraina bayrağı bar edi.
«Memorial» aq qorçalayıcı merkezi Volodımır Baluhnı siyasiy mabüs olaraq tanıdı. Aq qorçalayıcılarnıñ fikirince, faalni taqip etüv sebebi evinde tiklegen «Sema Yüzü Qaramanları soq., 18» levhası olğan.
