Rusiyede apiske alınğan qırımlı ukrain faali Volodımır Baluh «talabı yerine ketirilgeni içün» açlıqnı toqtattı. Qırım aq qorçalayıcı gruppasınıñ malümatına köre, Volodımır Baluhnı bugün, iyülniñ 5-nde, Rusiyeniñ Torjok şeerindeki №4 koloniyada Ukraina konsulı ziyaret etti.
Al-azırda Baluh kamera şeklindeki odada buluna. Faalni anda bir qaç ayğa yerleştirdiler. Baluhnıñ iç tertip-nizamnıñ «bozucısı» olğanına esaslanalar.
Diger menbalar bu malümatnı şimdilik tasdıqlamadı. Qırım.Aqiqat Baluhnıñ advokatlarınen bağlana.
Cumaaqşamı künü, iyünniñ 27-nde, Rusiye Apostol pravoslav kilsesiniñ yepiskopı, Sankt-Peterburg Aq qorçalayıcı şurasınıñ azası Grigoriy Mihnov-Vaytenko Qırım.Aqiqatqa Rusiyeniñ Tver vilâyetindeki koloniyada tutulğan Volodımır Baluh kene açlıq ilân etti, dep bildirdi. İyünniñ 28-nde Baluhnıñ advokatı Olga DinzeBaluh yuqlamay ve suv içmey, dep tarif etti.
Bir qaç kün evelsi ukrainalı faal Volodımır Baluh Tver vilâyetiniñ koloniyasındaki ceza izolâtorına qapatıldı. Daa evel Baluhnı ceza izolâtorına avuştırğanda anda o, aman-aman eki ay bulundı. Soñra onı apishane hastahanesine avuştırğan ediler.
2018 senesi martnıñ 19-nda Volodımır Baluh açlıqqa başlağan edi. Bir aydan ziyade bir şey aşamağan Baluh Arhiyepiskop Klimentni diñlep, kisel içmege, peksimet aşamağa razı olğan edi. Daa soñra mahküm etilgen ukrain faali açlıqnı vaqtınca toqtatmağa qarar aldı.
Advokatlarnıñ malümatına köre, 200 künden çoq açlıq tutqan Baluhnıñ ülser ve pankreatit şübesi peyda oldı.
Volodımır Baluh – qırımlı çiftçi, ukrainalı cemaat faali, Ukrain milletçileri kongressiniñ azası. Rusiye Qırımnı ilhaq etken soñ Rusiye vatandaşlığından vazgeçti. 2013 senesi qışta evinde Ukraina bayrağını astı, daa soñra «Sema Yüzü qaramanları soqağı» levhasını tikledi.
2016 senesiniñ soñunda Volodımır Baluhnı Rusiye FSBsiniñ hadimleri tutıp aldı. Olar Baluh yaşağan evniñ çardaqında 90 patron ve bir qaç trotil taş tapılğanını bildirgen edi. Rusiye kontrolindeki Qırım mahkemesi onı 5 yılğa azatlıqtan marum etti – eki cinaiy dava boyunca: silâ saqlaması ve «Aqşeyh vaqtınca tutuv izolâtorınıñ yolbaşçısını köteklev» dep adlandırılğan adise.
Baluh qabaatını tanımayıp, açlıqqa başlağan edi. Baluhnıñ imayesi ve aq qorçalayıcıları onıñ Ukrainağa qoltutqanı içün repressiyalarnıñ qurbanı oldı, dep tüşüneler. «Memorial» aq qorçalayıcı merkezi Volodımır Baluhnı siyasiy mabüs olaraq tanıdı.
