İşğal etilgen Qırımda mahküm etilgen ukrain faali Volodımır Baluh aprelniñ 4-nde Rusiyeniñ Torjok şeerindeki №4 koloniyanıñ ceza izolâtorına qapatıldı. O, aprelniñ 19-na qadar anda qalacaq. Bu aqta Baluhnıñ qız qardaşı Nadejdağa aprelniñ 9-nda koloniyanıñ memuriyeti bildirdi, dep yaza Qırım aq qorçalayıcı gruppası.
Aş ve urba alınmadı, çünki mabüs Ceza izolâtorında olğanda körüşüv ve aş, urba kibi şeyler yasaq etile. Ceza izolâtorında mabüslerni sert şaraitlerde tutıp, tek ötmek ve suv bereler.
Aprelniñ 8-nde de Volodımır Baluhnıñ qız qardaşı Nadejdadan aş ve urba qabul etilmedi.
Koloniya memuriyeti «bazarertesi künü bir şey qabul etilmey», dep bildirgen edi.
Kreml kontrolindeki Qırım Yuqarı mahkemesi ukrain faali Volodımır Baluhnıñ imayesine cezası müddetiniñ ğayrıdan baqıluv muracaatını red etti. Kreml nezaretindeki Qırım Yuqarı mahkemesi Volodımır Baluhnı 4 yıl ve 11 ay umumiy rejim koloniyasında qalmasına ve 10 biñ ruble (tahminen 4 biñ ğrıvnâ) para cezasını ödemesine üküm etti. Faal eki cinaiy iş boyunca tevqif etildi.
2018 senesi martnıñ 19-nda Volodımır Baluh açlıqqa başlağan edi. Bir aydan ziyade bir şey aşamağan Baluh Arhiyepiskop Klimentnidiñlep, kisel içmege, peksimet aşamağa razı olğan edi. Daa soñra mahküm etilgen ukrain faali açlıqnı vaqtınca toqtatmağa qarar aldı.
Advokatlarnıñ malümatına köre, 200 künden çoq açlıq tutqan Baluhnıñ ülser ve pankreatit şübesi peyda oldı.
FSB, Volodımır Baluhnı 2016 senesi dekabrniñ 8-nde tuttı. FSB hadimleri Volodımır Baluh yaşağan evniñ çardaqında 90 patron ve bir qaç trotil taş tapılğanını bildirgen edi. Baluhnıñ imayesi ve aq qorçalayıcıları onıñ Ukrainağa qoltutqanı içün repressiyalarnıñ qurbanı oldı, dep tüşüneler. Onıñ evinde Ukraina bayrağı bar edi.
«Memorial» aq qorçalayıcı merkezi Volodımır Baluhnı siyasiy mabüs olaraq tanıdı. Aq qorçalayıcılarnıñ fikirince, faalni taqip etüv sebebi evinde tiklegen «Sema Yüzü Qaramanları soq., 18» levhası olğan.
