Ukraina Yuqarı Radasınıñ deputatı İrına Ğeraşçenko («Avropa birdemligi» fraktsiyası) bildirgenine köre, sentâbrniñ 7-nden 8-ne keçer gecesi Kyivde Kremlniñ eski siyasiy mabüsi, qırımlı Volodımır Baluh ameliyat oldı ve reanimatsiyada buluna.
«Ameliyat şimdi bitti, onı (Baluhnı – QA) reanimatsiyağa alğanlar. Volodânıñ ağıp bir qafa-miy yarası bar, baştan ameliyat oldı, alı ağır. Mariya İonovanen baş ekim Tkaçenkonen laf ettik, Volodânen körüştirmeyler. Tafsilâtlı malümat beremegen ekimlerni raatsızlamamağa rica eteler, çünki köteklevnen bağlı tahqiqat başlatıldı», – dep yazdı Ğeraşçenko Facebookta.
Volodımır Baluhnıñ reabilitatsiyası çoq sürecek, dep bildirdi.
Kyivniñ Milliy politsiyası, Baluh nasıl köteklendi ögrene, dep qayd etti. Ukraina prezidentiniñ ofisi qırımlığa yapılğan ücüm sebebinden qasevetlengenini bildirdi.
Baluh köteklengenini Oleg Sentsov haber etti. Onıñ malümatına köre, faal sentâbrniñ 7-nden 8-ne keçer gecesi köteklendi. Ağır alda hastahanege alındı – qolu ve köpürçik kemigi sındırıldı. Qırım.Aqiqat, Baluhnıñ nomerasına telefon etti, amma qadın cevap berdi. O, Sentsovnıñ malümatını tasdıqladı, amma özüni tanıtmadı.
İyünniñ 12-nde Kyivde faal Serğiy Sternenkonıñ sıñırlav tedbiri belgilengen mahkeme vaqtında politsiya hadimleri Volodımır Baluhqa qarşı küç qullandı.
