Eski ukrainalı siyasiy mabüs, qırımlı Volodımır Baluh dünya toplulığını Milât bayramını Rusiye apishanelerinde qutlağan siyasiy mabüslerniñ azat etilüvine irişmesine çağırdı.
«Üç Milât bayramını Rusiye apishanesinde qutladım. Apishane zamanlarını bir söznen ifadeler edim – igrenüv. Bu yılbaş bayramlarını dostlarımnen beraber qutlayım, amma tuvğanlarım yanımda degil, çünki şimdilik işğal etilgen Qırımda bulunalar», – dep bildirdi Baluh.
Baluhtan ğayrı, Let my people go aktsiyasında eski ukrainalı siyasiy mabüsler Roman Suşçenko, Artur Panov, Aleksey Sizonoviç, Nikolay Karpük iştirak ettiler. Videonı içtimaiy ağlarda Ukraina Tış işler nazirligi aydınlattı.
Ukraina Tış işler nazirligi, Rusiyede qanunsız alda apiste tutulğan 100-den çoq Ukraina vatandaşı Milât bayramlarını apishanede qutlay, dep bildirdi.
2019 senesi sentâbrniñ 7-nde rusiyeliler tutqan 35 ukrainalı Ukrainağa qayttı. Ukrainada çeşit cinayetlerde qabaatlanıp mahküm etilgen 35 Rusiye ve Ukraina vatandaşı Rusiyege teslim etildi.
Tutulğan şahıslar soñki sefer 2019 senesi dekabrniñ 29-nda Donetsk vilâyetiniñ «Mayorsk» keçiş noqtasında deñiştirildi. Umumen almaşuv çerçivesinde Ukrainağa 76 insan teslim etildi: 12 arbiy ve 64 vatandaş.
Dekabrniñ 30-nda Ukraina prezidentiniñ Qırım Muhtar Cumhuriyetindeki temsilciligi qırımlı mabüsler kelecek basamaqta azat etilecek insanlar cedveline kirsetilecek, dep bildirdi.
Volodımır Baluh – qırımlı çiftçi, ukrainalı cemaat faali, Ukrain milletçileri kongressiniñ azası. Rusiye Qırımnı ilhaq etken soñ Rusiye vatandaşlığından vazgeçti. 2013 senesi qışta evinde Ukraina bayrağını astı, daa soñra «Sema Yüzü qaramanları soqağı» levhasını tikledi.
2016 senesiniñ soñunda Volodımır Baluhnı Rusiye FSBsiniñ hadimleri tutıp aldı. Olar Baluh yaşağan evniñ çardaqında 90 patron ve bir qaç trotil taş tapılğanını bildirgen edi. Rusiye kontrolindeki Qırım mahkemesi onı 5 yılğa azatlıqtan marum etti – eki cinaiy dava boyunca: silâ saqlaması ve «Aqşeyh vaqtınca tutuv izolâtorınıñ yolbaşçısını köteklev» dep adlandırılğan adise.
Baluh qabaatını tanımayıp, açlıqqa başlağan edi. Baluhnıñ imayesi ve aq qorçalayıcıları onıñ Ukrainağa qoltutqanı içün repressiyalarnıñ qurbanı oldı, dep tüşüneler. «Memorial» aq qorçalayıcı merkezi Volodımır Baluhnı siyasiy mabüs olaraq tanıdı.
