Ukraina faali Vladimir Baluh Kreml nezaretindeki Qırım Yuqarı mahkemesiniñ ükmüne qarşı bergen şikâyet arizası baqılğan oturışuvında video bağı vastasınen iştirak etmekten vazgeçip, kameradan çıqmadı, dep bildire oktâbrniñ 3-nde Qırım.Aqiqat mühbiri.
İmaye tarafı Baluhnıñ mahkemege ketirilmesini rica etken edi, amma mahkeme izin bermedi. Bundan ğayrı, oturışuvda Aqşeyh rayonınıñ vaqtınca tutuv izolâtorınıñ zarar körgen yolbaşçısı Valeriy Tkaçenko yoq.
Daa evel haber etilgeni kibi, Baluh Qırım mahkemesine ketirilmedi. Anda vaqtınca tutuv izolâtorınıñ faaliyetini bozuv aqqında cinaiy iş ükmüniñ şikâyet arizası baqılmaqta.
Rusiye nezaretindeki Qırım Yuqarı mahkemesi sentâbrniñ 24-nde ukrain faali Vladimir Baluhnıñ vaqtınca tutuv izolâtorınıñ faaliyetini bozuv aqqında cinaiy iş ükmüniñ şikâyet arizasınıñ baqılmasını başqa künge qaldırğan edi.
«Baluh videokonferentsiya bağı odasına çıqmayıp, imayeniñ şikâyet arizası baqılacaq mahkemege alıp ketirilmesini rica ete», – dep tarif etti Baluhnıñ advokatı Olga Dinze.
Advokatnıñ qayd etkenine köre, Baluh Kreml nezaretindeki Qırım Yuqarı mahkemesiniñ qadısı Yelena Spasenovağa ariza berip, mahkemede video bağı vastasınen iştirak etmege razı olmağanını ve şahsen olmağa istegenini bildirecek.
Qırımda apiste tutulğan ukrain faali Vladimir Baluh 2018 senesi martnıñ 19-nda başlağan müddetsiz açlıqnı devam ete. Bir aydan berli bir şey aşamağan Baluh Arhiyepiskop Klimentni diñlep, kisel içmege, peksimet aşamağa razı olğan edi.
İyülniñ 5-nde Rusiye kontrol etken Aqşeyh rayon mahkemesi ukrain faali Vladimir Baluhqa 5 yıl apis cezası ve 10 biñ ruble (4 biñ grivna) para cezasını tayin etti.
FSB Vladimir Baluhnı 2016 senesi dekabrniñ 8-nde tuttı. FSB hadimleri Vladimir Baluh yaşağan evniñ çardaqında 90 patron ve bir qaç trotil taş tapılğanını bildirgen edi. Baluhnıñ imayesi ve aq qorçalayıcıları onıñ Ukrainağa qoltutqanı içün repressiyalarnıñ qurbanı oldı, dep tüşüneler. Onıñ evinde Ukraina bayrağı bar edi.
