İlhaq etilgen Qırımda apis etilgen ukrain faal Volodımır Baluhnı Tver vilâyetinniñ koloniyasında kene ştraf izolâtırına qoydılar.
Bu aqta iyün 20-sinde Qırım.Aqiqatqa tefsir bergende Rusiye yepiskopı ve Sankt-Peterburgnıñ Uquq qoruyıcı şuranıñ azası Grigoriy Mihnov-Vaytenko haber etti.
Baluh ŞİZOda olğanını yepiskop, oña koloniyağa yollamanı yibermege tırışqanda bildi.
"Oña kene yollanmalar qoyuldı... Bugün kettik. Bugün, yollanmalarnı qabul etken qadın, oña bermek mümkünmi, yoqmı, dep soraştırğanda, Baluh kene ŞİZOğa oturtılğanını ve, demek, oña yollanma yibermege qail olunmağanını bildirdi. Bunı tahminen yarım saat evel bildik", - dedi Grigoriy Mihnov-Vaytenko.
Ukraina vatandaşı ŞİZOda qaç vaqıt bulunğanı belli degil.
Baluhnıñ advokatı Olga Dinze, o bunıñ aqqında bir şey bilmey, dep Qırım.Aqiqatqa ayttı. O, müşterisine iyün 21-inde ketmege azırlana.
Mayıs soñunda Volodımır Baluhnı ŞİZOda bulunğanında soñ apishane hastahanesine qoydılar.
