Rusiye Devlet dumasınıñ işğal etilgen Qırım deputatı Ruslan Balbekniñ bildirgenine köre, o, Moskva kontrolindeki Qırım yolbaşçısı Sergey Aksenovğa muracaat etip, «qırımtatar halqını ifade etmek içün «qırımtatar» sözüniñ «qoşulıp yazılışını» belgilemesini rica ete.
Bu aqta o, Facebook saifesinde yazdı.
«Eskiden bir çoq kişi halqımıznıñ adını defisnen yaza edi, gizlemeyim, bunıñ yaramay bir manası ya da aqaretlemek istegi yoq, – bir norma yoq edi, der edim. Amma defisnen yazılışı qırımtatarlarnıñ canını ağırta edi», – dep bildirdi Balbek.
Deputatnıñ aytqanına köre, aprelge qadar «qırımtatar» sözüniñ tek qoşulıp yazılışına dair buyruqnı azırlamağa isteyler.
«Soñra Qırım anayasasına deñişme kirsetüv, senet ve diger vesiqalar üzerinde iş olacaq, – amma bu endi yerli iş olacaq. Esas ve strategik qarar alındı!», – dep ayta Balbek.
Aksenov, Devlet duması deputatınıñ muracaatına daa cevap bermedi.
Hatırlatamız, qomşu Rusiyede «qırımtatar» sözü defisnen yazıla, Qırımda işğalden evel, bütün Ukrainada olğanı kibi, qırımtatar halqınıñ adı qoşulıp yazılğan edi.
