Ukrayınada 1914 bala Rusiye istilâsı neticesinde zarar kördi, 550-si elâk oldı. Bu aqta memleketniñ Baş prokuror ofisi haber etti.
Resmiy malümatqa köre, 1364-ten çoq bala çeşit yaralar aldı.
«Eñ çoq bala böyle vilâyetlerde zarar kördi: Donetsk – 534, Harkiv – 389, Herson – 152, Dnipropetrovsk – 139, Kyiv – 130, Zaporijjâ – 108, Mıkolayıv – 107», – dep aytıla haberde.
Mayısnıñ 30-nda Rusiyeniñ Harkivge qarşı darbesi neticesinde 12 yaşında oğlançıq ve qızçıq zarar körgenler.
Harkiv vilâyetiniñ yolbaşçısı iyünniñ 1-nde saba Rusiye ordusınıñ Balakliya şeerine qarşı ücümi aqqında haber etken edi, neticesinde sekiz bala zarar kördi.
Rusiye arbiyleri Ukrayına regionlarına çeşit silâdan muntazam surette ücüm ete. Delillerge ve şaatlıqlarğa baqmadan, Moskva, tam bir istilâ başlağanından berli, vatandaşlarğa qarşı yapılğan ücümni red ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
