626 baladan çoq Ukrainada Rusiye Federatsiyasınıñ Ukrainağa qarşı silâlı istilâsı neticesinde zarar kördi, dep haber ete Ukraina Baş prokurorınıñ ofisi çağına yetmegenlerniñ prokurorlarına esaslanıp.
Resmiy malümatqa köre, 220 bala can berdi ve 406 bala yaralandı.
Bu raqamlar soñki degil, çünki faal cenk areketleri ketken yerlerde, vaqtınca işğal etilgen ve azat etilgen topraqlarda malümat teşkerile, dep haber ete Baş prokurornıñ ofisi.
«Eñ çoq Donetsk vilâyetinde – 139, Kyiv vilâyetinde – 115, Harkiv vilâyetinde – 95, Çerniğiv vilâyetinde – 68, Herson vilâyetinde – 45, Mıkolayıv vilâyetinde – 43, Lugansk vilâyetinde – 37, Zaporijjâ vilâyetinde – 27, Sumı vilâyetinde – 17, Kyivde – 16, Jıtomır vilâyetinde – 16 bala zarar kördi», – dep aytıla haberde.
Mayısnıñ 2-nde Rusiye ordusınıñ raketa darbeleri neticesinde Odesada 14 yaşında oğlançıq vefat etti ve 17 yaşında bir qız yaralandı.
Rusiye Federatsiyası silâlı quvetleriniñ er künlik bombardıman ve ateşleri sebebinden 1584 oquv yurtu zarar kördi, 118-i tamamen yıqıldı.
Ukrayinağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Aprelniñ başında Moskva Ukrayina şimalinde faal olğanını toqtattı, dep bildirdi. Tezden Ukrayina akimiyeti Kıyiv, Çerniğiv ve Sumı vilâyetinde Rusiye arbiyleri qalmadı, dep ayttı.
Rusiye ordusı çekilgen soñ azat etilgen köy ve şeerlerde kütleviy öldürüv adiseleri aqqında belli oldı. Bazı ğarbiy liderler Rusiyeni cenk cinayetlerinde qabaatladı. Rusiye akimiyeti arbiyleriniñ öldürüvlerge alâqası bar olğanını inkâr etip, olarnı «uyduruv» dep adlandıra.
Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d2ud65mnh9spru.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
