Rusiyeniñ idaresi altındaki Bağçasaray rayon mahkemesi Baştanovka köyüniñ sakinini Ukrayina Silâlı Quvetlerini paranen temin etmege açıqtan-açıq çağırğanında qabaatladı. Bu aqta Qırım boyunca Rusiye prokuraturasınıñ matbuat hızmetinden bildirdiler.
Rusiye nezareti altındaki mahkemeniñ malümatına köre, yigit içtimaiy ağda haberler yerleştirgen.
"2025 senesi yazda, aşkâr olmaqtan qorqıp, o, öz esap saifelerini yoq etti. Onıñ areketlerini FSB-niñ Qırım Cumhuriyeti ve Aqyar şeeri boyunca idaresiniñ hadimi toqtattı", — dep idda ete Rusiye idaresi.
Rusiyeniñ nezareti altındaki mahkeme Qırım sakinini altı yılğa mahküm etti, umumiy rejimli ceza koloniyasında müddetini keçirmege qarar berdi. O, beş yıl devamında veb-saytlar, forumlar, çatlar ve içtimaiy ağlar gruppalarını idare etmekten de diskvalifikatsiya etildi.
Haber etilgenine köre, üküm daa quvetini almağan. Qırımdaki Rusiye prokuraturasından berilgen beyanatta mahküm etilgen şahsnıñ adı, em de iş boyunca onıñ pozitsiyası açıqlanmadı.