Sağanaqlardan zarar körgen Bağçasaray rayonında Rusiye akimiyeti yuqunç hastalıqlarğa qarşı aşı yapacaq olalar. Bunı Qırım boyunca Rusiye Rospotrebnadzornıñ başı Natalya Penkovskaya haber etti.
«Yaltada olğanı kibi aynı tedbirler yapılacaq. Hadimlerge aşı yapılacaq, Yaltada yalıñız miqdar başqa», – TASS Penkovskayanıñ aytqanlarını ketire.
Bu kibi tabiat afetleri taqdirinde mümkün olğan yuqunç hastalıqlarnıñ peyda oluvı daa qayd etilmegen.
«Amma unutmamalımız, er bir hastalıqnıñ inkubatsiya müddeti bar. Şunıñ içün böyle kibi bir şeyniñ aldını almaq kerek ve biz kerekl tedbirler keçirecekmiz», – dep qoştı o.
Qırımda toqtamağan sağanaqlar sebebinden iyülniñ 4 ve 5-nde Bağçasaray rayonındaki bir sıra mesken yer suv altında qaldı. Küçlü yağanaqlar Bağçasaray rayonında tahminen 100 evni suv basmasına sebep oldı. Suv basuvından zarar körgen esas köyler – Albat, Kokköz, Foti Sala, Aromat. Şiddetli yağanaqlar sebebinden Belbek, Kokköz ve Baga özenleri taştı.
Bağçasaray rayonında suv basqan yerlerden 160 insan tahliye etildi, olarnıñ arasında 31 bala.
Qırım Gidrometeorologik merekeziniñ malümatına köre, Belbek özeninde suv seviyesi 2 metr 40 santimetr artqan.
Keçenlerde Bağçasaray rayonında Fevqulâde vaziyet ilân etildi.
