Rusiye kontrolindeki Bağçasaray rayon mahkemesi Ukrayına gimni icra etilgen videonı derc etkeni içün 20 yaşında yerli sakinge 50 biñ ruble para cezasını berdi, dep haber ete mahkemeniñ matbuat hızmeti.
«Mahkeme uquq bozucınıñ memuriy cinayet yapuv qabaatı isbatlandı ve areketleri Rusiye Federatsiyası ve vatandaşlarınıñ menfaatlarını qorumaq, halqara barışıq ve telükesizlikke qoltutmaq maqsadınen Rusiye Federatsiyası Memuriy uquq bozuvları kodeksiniñ 20.3.3 maddesiniñ 1-inci qısmına istinaden Rusiye Silâlı quvetlerini itibardan tüşürüv olaraq tasnif etilmeli, dep qarar aldı», – dep aytıla haberde.
Rusiye mahkemesiniñ matbuat hızmeti ceza alğan qıznıñ adını aytmay, amma Rusiye tarafdarı bloger Aleksandr Talipov «Krımskiy Smerş» Telegram kanalında Bağçasaray rayonınıñ Aqtaçı (Furmanovka) köyüniñ sakini Evelina Memetova aqqında kete, dep bildirdi. Talipov qız içtimaiy ağlardan birinde Ukrayına gimnini icra etkenini aytıp, onı Rusiye uquq qoruyıcılarına şikâyet etti.
Rusiye tarafdarı bloger Aleksandr Talipov «Krımskiy SMERŞ» ve «TalipoV Online Z» Telegram kanallarında Ukrayınağa qoltutqan qırımlılarnıñ şahsiy malümatını derc ete. Talipovnıñ şikâyetleri neticesinde qırımlılarnı Rusiye ordusını «itibardan tüşürgeninde» qabaatlap, memuriy ve cinaiy mesüliyetke çekeler.
Qarasuvbazar tehnikumınıñ sabıq ocası Andrey Belozerov içtimaiy ağlarda Ukrayına yırları ve Rusiyege qarşı lafları sebebinden Talipovnıñ şikâyetlerinden soñ üç yıl apis cezası berile bile.
Ukrayına prokuraturası Talipovğa qarşı «milletlerara nefret doğuruv» maddesine istinaden cinaiy tahqiqat başlattı.
2022 senesi noyabr ayında «Krım SOS» aq qorçalayıcı teşkilâtı 9 ay devamında Rusiye mahkemeleri Rusiye ordusını «itibardan tüşürüvnen» bağlı 200-den çoq memuriy dava baqtı. Qırımlılarğa Ukrayına yırlarını diñlegenleri, Ukrayına Silâlı quvetleri ve Ukrayınağa qoltutuv şiarlarını yazğanları içün para cezalarını bereler.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
