Kyivde bazarertesi künü, noyabrniñ 22-nde, Qırımtatar resurs merkezi «Babamnı qaytarıñız!» vesiqalı filmini taqdim etti. Levha, Qırım Rusiye tarafından işğal etilgen soñ babaları apiske alınğan ya da hırsızlanğan balalar aqqında tarif ete.
Taqdim merasiminde Qırımtatar resurs merkeziniñ idare reisi, Qırımtatar Milliy Meclisiniñ uquq ve tış işler meseleleri idaresiniñ reberi Eskender Bariyev, göñülli Mıroslav Ğay, Almaniyanıñ Ukraina elçihanesiniñ siyasiy meseleler ekinci kâtibi Lukas Bem iştirak etti. Jurnalist ve siyasetşınas Taras Berezovets moderator olaraq iştirak etti.
«Taqdim merasiminde film üzerinde çalışqan bütün taqım azaları bar edi ve film taqdimine çet devletlerniñ elçihane vekilleri, Qırımtatar Milliy Meclisiniñ temsilcileri, faal, göñülli, cemaat erbapları, jurnalist ve digerleri keldi», – dep haber etti Qırımtatar Resurs Merkezi.
Teşkilât, bu levha vastasınen Ukraina ve halqara cemaatçılığınıñ diqqatını Qırımnıñ siyasiy mabüsleriniñ ve ana-babasından az zarar körmegen balalarnıñ meselesine celp etmege istey, dep qayd etti. Levha yedi tilde olacaq: ukraince, arapça, almanca, inglizce, türkçe, italyanca ve ispanca.
Seyirciler filmni kelecek sene körip olur. Bu levha halqara ve Ukraina kinofestivallerinde iştirak etecek.
