Qırımnıñ arbiy komissarlığı 2019 senesi baarinde 2,8 biñ qırımlını Rusiye ordusına askerlikke almağa planlaştıra. Çoqusı, 85%-ı, qomşu Rusiyeniñ regionlarında askerlik yapacaq. Qırımda tek 400 insan qalacaq. Bu aqta Kreml kontrolindeki Qırımnıñ arbiy komissarlığınıñ askerlikke azırlıq ve aluv bölüginiñ yolbaşçısı Sergey Bıkov aprelniñ 16-nda Aqmescitteki matbuat konferentsiyasında bildirdi.
«Bu sene 2,8 insannı askerlikke çağıramız. Olardan tahminen 400 kişi Qırımda askerlik yapacaq. Qırım Cumhuriyetiniñ sakinleri bu sene esasen Cenübiy, Ğarbiy arbiy okruglarnıñ birleşmelerine ve merkeziy itaat bölüklerine çağırıla», – dep bildire Bıkovnıñ aytqanlarını Qırımnıñ Rusiye akimiyetine yaqın olğan «Krıminform» saytı.
Onıñ qayd etkenine köre, bu sene askerlikke alınacaqlarnıñ aman-aman yarısı Ava-kâinat quvetlerinde hızmet etecek.
«Esas qısmı Ava-kâinat quvetlerine alınacaq – 1,3 biñden ziyade insan. Qara quvetleri ve flotqa da alınacaqlar», – dep qayd etti Bıkov. Onıñ bildirgenine köre, yarımada tışında askerlik yapacaqlarnı hızmet yerlerine arbiy-naqliye aviatsiyasınıñ uçaqlarınen alıp ketecekler.
Bundan evel Rusiye akimiyeti 2019 senesi baarinde 2,5 biñ qırımlı ve aqyarlını askerlikke yollaycaq, dep haber etilgen edi.
Rusiye ordusına baar çağırıluvı 2019 senesi iyülniñ 15-ne qadar devam etecektir.
Kyiv Rusiyeden işğal etilgen Qırım sakinlerini silâlı quvetlerine çağıruvını toqtatmasını talap ete. QMC prokuraturası qırımlılarnı Rusiye ordusında hızmet etüv içün celpname alğanda telefon ya da elektron poçta vastasınen muracaat etmege rica ete.
Ukrainadaki BM insan aqları monitoring missiyası bildirgenine köre, 2017 senesi eñ az 4800 Qırım sakini Rusiye silâlı quvetlerine çağırıldı. OSCE ABD işleri vaqtınca vekâletlisi Garri Kamiannıñ malümatına köre, 2018 senesi 5600 qırımlı Rusiye ordusına çağırıldı.
Qırım aq qorçalayıcı gruppasınıñ malümatına köre, Rusiyeniñ Qırım işğali başlağanından berli Rusiye 15 biñ qırımlını askerlikke çağırdı.
