Ukraina prezidentiniñ Qırım Muhtar Cumhuriyetindeki daimiy temsilciligi qırımtatar milliy bayramı Hıdırleznen hayırladı.
«Bu baar, bereket bayramınıñ tamırları qadimiy zamanlardan kele ve bir çoq anane ve merasimnen bağlı: evler cıyıştırıla, milliy aşlar pişirile, milliy yır, oyun icra etile, sport yarışları, ateşni atlav, fal baquv ola», – dep aytıla temsilcilikniñ Facebook haberinde.
Zelenskıynıñ qayd etkenine köre, işğal şaraitlerinde bu bayram birleşmek ve milliy ananelerni coymamaq içün daa bir imkân oldı.
«Qırımtatar qorantaları qavuşacaq daa bir bayram künü tezce kelsin isteymiz: ana-babaları işğalden sebep yarımadanı terk etmege mecbur olğan balalarını, balalar qanunsız apiske alınğan babalarını, qadınlar aqaylarını qarşılasın», – dep qayd etti temsilcilik.
Hıdırlez – türkiy halqlarnıñ eñ büyük bayramlarından biri. XIX asırda onıñ şeñlikleri üç kün devam ete edi. Hıdr ve İlyas Peyğamberleri bir arağa kelgen mayısnıñ 6-nda qayd etile. Merasimlerde qadimiy tuvarcılıq ananeleri bar.
Qırımnıñ ilhaqından soñ Qırımtatar Milliy Meclisiniñ vekilleri yarımadada yapılğan Hıdırlez şeñliklerinde iştirak etmekten vazgeçti. Ondan ğayrı olar, Rusiye tarafından ilhaq etilgen Qırımda bulunğan yurtdaşlarını da böyle şeñliklerde iştirak etmekten vazgeçmege davet ettiler.
