Ukraina baş naziriniñ muavini Vâçeslav Kirilenkonıñ aytqanına köre, «Eurovision-2019» yır yarışında Ukrainanı temsil etecek kişinen bağlı «gibrid degil de» «ukrain qararı» qabul etilmeli. Bu aqta o, Twitterde fevralniñ 25-nde yazdı.
«Rusiyede onlarnen kontsertni keçirgen artistler Ukrainanı «Eurovisionda» temsil etse, Rusiyede bir qaç kontsertniñ lâğu etilüvi Ukraina alacaq telükelerni yoq etmey. Qarar tüşünmeli. Ukrain olmalı. Gibrid degil», – dep yazdı Kirilenko.
Fevralniñ 23-nde «Eurovision-2019» ukrain milliy saylavında yırcı Maruv ğalebe qazandı. O, 2019 senesi mayıs ayında Ukrainanı yır yarışında temsil etecek. Daa evel Maruv Rusiyede çıqışta bulunğanını aytqan edi.
Final neticelerine köre o, 12 baadan 11-ini qazandı. Jüri azaları yırcığa 5 baa qoydı, seyircilerniñ rey berüv neticelerine köre Maruv eñ yüksek 6 baanı aldı.
«Eurovision-2019» yır yarışında Ukrainanı temsil etecek kişinen bağlı qararnı Milliy cemaat teleradiokompaniyası milliy saylav neticeleri ilân etilgeninden 48 saat içinde tasdıqlamalı.
