Ukraina baş naziri Oleksiy Ğonçaruk, akimiyet işğal etilgen Qırımda ve işğal etilgen Donbas topraqlarında yaşağan ukrainalılar içün küreşecek, dep bildirdi. Bu aqta o, «TSN» yayınında «normand formatında» körüşüvni izaatlap ayttı.
«Mence, eñ yahşı yol, nasıl olsa da, ateşniñ toqtatılması ve esirlerni almaştıruv ola. Ukrainalılar evge qaytmaq kerek. Bu eki esas vazifeni prezident Zelenskıy özüne qoydı», – dep ayttı ükümet reisi.
Onıñ qayd etkenine köre, Parijdeki «A planı» bu zıddiyetni diplomatik yolnen al etmek, elbette, milliy menfaatlarnı qorçalap, barışıqqa ketmekten» ibaret.
«Topraq bütünligi, suverenitetten vazgeçüv şeklinde menfaatlarnı teslim aqqında laf yoq. Qırım ve Donbas – Ukraina toprağıdır, anda ukrainalılar yaşay, olar içün, olarnıñ evge qaytması içün mümkün olğanı qadar küreşecekmiz», – dedi baş nazir.
Dekabrniñ 9-nda «normand dördü» liderleriniñ üç yıl içinde ilk körüşüviniñ keçirilmesi planlaştırıla. Ukraina prezidenti Volodımır Zelenskıy, Frenkistan prezidenti Emmanuel Macron, Almaniya kantsleri Angela Merkel ve Rusiye prezidenti Vladimir Putin Frenkistannıñ paytahtı Parijde muzakereler keçirecekler.
Donbastaki silâlı zıddiyet 2014 senesinden berli Rusiyeniñ Qırım işğalinden soñ devam ete. Ukraina ve Ğarp Rusiyeni separatistlerge silâlı yardım köstergeninde qabaatlaylar. Kreml bu qabaatlarnı red ete ve Donbasta ancaq Rusiye «göñüllileri» bar, dep israr ete.
BM malümatına köre, 2019 senesi oktâbrniñ 31-ne qadar silâlı zıddiyet neticesinde Donbasta 13000 - 13200 insan elâk oldı.
