Qırım karantinge ketti: martnıñ 28-nden aprelniñ 5-ne qadar yarımadada maşina yuvucı, qave ve restoranlar, bir sıra tükân, lombard, kinoteatr, sport salonları, berberhane ve diger müessiseler qapalı olacaq. Bunı tenbi levhaları isbatlay.
Yalta yalısına da kiriş qapatıldı. Aqyardaki «Hersones Tavriçeskiy» müzey qoruğı ve Bağçasaraydaki Han sarayı işini toqtattı.
Bazı cemaat aşayt müessiseleri işine devam ete: evge aş sımarlamağa ya da kelip almağa mümkün. Qırımlılarnı evde qalıp, kerek olmasa, soqaqqa çıqmamalarına çağıralar.
Martnıñ 31-ne qadar Qırım ve Aqyarda 21 koronavirus hastası qayd etildi. 3953 insan tibbiy közetüv altında buluna.
Facebook Forum