Aprelniñ 8-nde Rusiye tahqiqatı Bağçasaraydaki üçünci «Hizb ut-Tahrir davasınıñ» mabüsleri Osman Seytumerov, qardaşı Seytumer Seytumerov ve Rustem Seytmemetovnı Rusiye Ceza kodeksiniñ 205.5 maddesiniñ 2-nci qısmına istinaden qabaatladı. Bu aqta qabaatlanğan qırımlılarnıñ advokatları «Qırım birdemligi» birleşmesine bildirdi.
«Seytumerov Osman Şükriyeviçten ğayrı, doğmuş qardaşı Seytumer ve emcesi Seytmemetov Rustem qabaatlandı. Ev apsinde bulunğan Suleymanov Ametniñ de qabaatı bildirilgendir», – dep tarif etti Emine Avamileva.
Qabaatlanğan Seytumer Seytumrovnıñ advokatı Edem Semedlâyevniñ bildirgenine köre, onıñ müvekkili qabaatını tanımay.
«№1 tahqiqat izolâtorında qabaatları bildirildi, hususan Seytumerov Seytumerniñ qabaatlı olaraq celp etilüvine dair qarar. Onı «Hizb ut-Tahrir» teşkilâtında iştirak etkeninde, Rusiye Ceza kodeksiniñ 205.5 maddesiniñ 2-nci qısmına istinaden cinayet işlegeninde qabaatlaylar. O, bu qabaatlavnı tanımay ve özüni qabaatsız dep saya. Yazma şeklinde bergen ifadesinde tintüv vaqtında edebiyat gizliden qoyuldı, dep bildirdi», – dep ayttı advokat.
Martnıñ 11-nde saba Rusiye quvetçileri Bağçasarayda ve Bağçasaray rayonında dört qırımtatarını tuttı. FSB, tutulğan şahıslarnı qomşu Rusiyede terror teşkilâtı olaraq tanılğan «Hizb ut-Tahrirde» iştirak etkeninden şübheli dep saya. «Memorial» Rusiye aq qorçalayıcı merkezi bu davada qabaatlanğanlarnı siyasiy mabüs olaraq tanıy.
Ukraina Tış işler nazirligi, FSBniñ Qırımda bu yapqanlarına qarşı narazılıq bildirdi. Müessise spikeri Yekaterina Zelenkonıñ qayd etkenine köre, Rusiye «dünya toplulığınıñ qırımtatarlarğa qarşı basqı toqtatmaq çağıruvlarını… bütün halqara, ükümetlerara institutlarnıñ qararlarını körmemezlikke ura». Qırım Muhtar Cumhuriyetiniñ Prokuraturası martnıñ 11-nde qırımtatarlarnıñ tutulmasınen bağlı cinaiy dava açtı.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
